Futsalimi GM-qarnissaanut pikkunartumik anngunniuttut

Futsalimi GM-qarnissaanut angutit Nuummi anngunniunnerani Sineriak Futsal aamma B-67 siartuugallarput. Anngunniunnermi unamminerit pikkunartut arlalli naammassipput sapaatiuppallu unamminerit kingulliit naammassissallutik. Arnat futsalimi GM-rnissaannut NÛK aamma B-67 anngupput.

Atuaruk: Qavaat futsalimi GM-mut piareerput

Angutit anngunniunneranni minutsit 20-t marloriarlugit unammisoqartarnerani unammineq naavillugu tamaviaartoqartarpoq. Iligiit arfinillit anngunniuteqataasut dommerit naggataamik siggarnissaa tikillugu imminnut ilungersuateqattaartarput unamminerillu arlallit periarfissanik atorluaallaqqinnerup aalajangertarpai.

Sineriak Futsal tassaavoq arsaattartut sineriammeersut katersuuffigisaat. Tassani ilaatigut arsaqataapput qatanngutigiit Nukannguaq aamma Johan Frederik Zeeb kiisalu Mads Andersen Qeqertarsuarmeersut. Taakku aamma ilagaat Amos Rosbach iligiinnut aamma ikkulluarsimasoq.

Nunanut allanut unammisartut
Sineriak Futsal aamma B-67 pikkunavimmik sapaammi unammigamik 2-2-mik naligiiginnarput tassanilu Amos Rosbach aamma Jan Jensen Sineriak Futsalimi isertitsisuupput. Norsaq Lund Mathæussenip isertitsingajuttuunini takuteqqippaa B-67ip isertitai marluusut isertikkamigit.

IT-79 aamma assut arsartugissaarpoq sulilu anngunnissamut periarfissaqarluni. Nunanut allanut unammisartut Kaassannguaq Zeeb Uummannameersoq aamma Palu Eriksen Aasianneersut arsaattunut IT-79-ip arsartuini pingaarutilittut inissisimapput.

B-67 aamma tamaviaarluarpoq tassanilu arsaqataapput aamma nunanut allanut unammisartuniittut Norsaq Lund Mathæussen aamma Frederik Funch.

Arnat piareerput
Allatut oqaatigalugu sapaatip akunnerata naanerani unamminerit tulliuttut pikkunassaqaat. Tassani IT-79 aamma B-67 imminnut unammissapput kiisalu Sineriak Futsal aamma IT-79 unammissallutik.

Arnat Nuummi anngunniunnerat naammassivoq. NÛK aamma B-67 anngupput pissartanngorniunnerit Ilulissani martsip naanerani ingerlanneqarnissaannut. NÛK, B-67 aamma IT-79 imminnut marloriarlutik unammillutik anngunniupput.

Aajuku arnat angusaat:
B-67 – IT-79 7-5
B-67 – NÛK 5-6
IT-79 – NÛK 1-8
B-67 – IT-79 9-1
B-67 – NÛK 1-5
IT-79 – NÛK 4-5

Aajuku angutit angusaat:
B-67 – B-12 3-1
Sineriak Futsal - GSS 7-2
IT-79 – NÛK 2-1
B-67 – Sineriak Futsal 2-2
B-12 – IT-79 5-5
GSS – NÛK 2-0

Aajuku arfininngornermi unammisussat:
B-67 – IT-79
B-12 – GSS
Sineriak Futsal – NÛK
B-67 – GSS
B-12 – NÛK
Sineriak Futsal – IT-79

Aajuku sapaammi unammisussat:
B-67 – NÛK
B-12 – Sineriak Futsal
GSS – IT-79