Futsalimi GM aallartilerpoq: Kikkut takutitsilluarsinnaanerpaappat?

Futsalimi angutit Nunatsinni pissartanngorniunnerat Paamiuni ullumi aallartissapput.

Timersoqatigiiffiit unammeqatttaarsussat ima agguataarsimapput:

Pulje 1:

• T-41, Aasiaat
• ATA, Tasiilaq
• B-67, Nuuk
• Nagtoralik, Paamiut

Pulje 2:

• Aqissiaq, Maniitsoq
• Young Guns, Nuuk
• Nagdlunguak, Ilulissat
• K-33, Qaqortoq

Futsalimi nunanut allanut unammisartuinut sungiusaasoq René Olsen pissartanngorniunnerit isiginnaassallugit qilanaarpoq.

- Unamminerit sakkortuut takussallugit qilanaarpunga. Taktikkikkut qanoq siuariartoqarsimanersoq takussallugu qilanaarnarpoq. Kikkut takutitsilluarsinnaanersut takussallugu aamma pissanganarpoq, Sermitsiaq.AG-mut oqarpoq.

Timersoqatigiiffiit Nuummeersut unammeqattaartarnertik iluaqutigisinnaagaat oqaatigaa.

- Timersoqatigiiffiilli arlallit takutitsilluarsinnaapput. Unammersuaarnermi isiginnaartorpassuit takussallugit pissanganarpoq, René Olsen oqarpoq.

Ajugaasinnaasut unammisartullu pissanganartut

Futsalimi arlaleriarluni pissartaareersoq, nunanullu allanut unammisartoq Frederik Funch GM ima inerneqassangatippaa:

• B-67
• Nagdlunguak
• Young Guns

Frederik Funch ajoqqusereernermi kingorna suliaritinnikuunini pissutigalugu pissartanngorniuteqataassanngilaq. Unammisartut arlallit takutitsilluarsinnaasut oqaatigaa:

- B-67-imi Bastian Rosing sukkasuujuvoq teknikkigilluni. Nunanut allanut unammisartutut misilittagaqalereerpoq. Rene Eriksen Petersenilu takutitsilluartarput, imminnut ilisimalluarput, unammersuaarnermi takussallugit pissanganaqaat. Rene Eriksen Petersen sukkallunilu teknikkigippoq, B-67-imi qanoq angusagissaartigisinnaanerat malinnaavigissallugit pissanganarlutik, oqarpoq.

Unammersuaarnermi unammisartut allat takutitsilluarsinnaasut ilaatigut ima oqaaseqarfigai.

- Phillip Holmene unamminerni sunniuteqarluartarpoq, teknikkigilluni isertitseriallaqqittarlunilu. Patrick Frederiksen pivotut assut pikkorippoq! Nukittullunilu iliminut tunniussillaqqittarpoq, isertitseriallaqqittarlunilu. Aqutsisutut piginnaaneqarluarpoq, killissaa tikillugu sukataartarluni. Aamma misilittagartuujunera sunniuteqarluarsinnaavoq, Frederik Funch oqaluttuarpoq.

Nunanut allanut unammisartunut anføreri

Unammisartut sunniuteqarluarsinnaasut allat ima oqaasertalerpai.

- Nagdlunguamit Lars Erik Reimer nunanut allanut unammisartunut anføreriuvoq, unammersuaarnerni takutitsilluartartuuvoq. Isertitseqattaanngikkuni isertitsissutaasunik tunniussarpassuaqartarluni. Isiginnaassallugu pissanganartuaannarpoq, Frederik Funch oqarpoq.

B-67-mi unammisartuusimasoq, maanna Young Gunsini unammisartuusoq Niklas Kleist aamma malunnaateqarluartussatut takorloorpaa.

- Young Gunsikkunni aalajangiisartorujussuuvoq, qanoq angusaqarsinnaanera takussallugu pissanganaqaaq. Young Guns inuusuttuaqqanik pissanganartorpassuarnik unammisartoqarpoq, arsariaasiat pissanganartoq angusarissaarfiusinnaanersoq takussallugu qilanaarnarluni, Frederik Funch oqarpoq.

Unammersuaarnermi unamminissat ima inissinneqarnikuupput: