Futsalimi arnat nunanut allanut unammisartut pilersinneqassapput

Kalaallit Arsaattartut Kattuffiata, KAK, arnat futsalimi unammisartut siuarsarumavai. Nunanut allanut unammisartunik pilersitsisoqassaaq, taakkulu aappaagu nunanut allanut allanut unammiartinnissaat sulissutigineqassalluni. Nunanut allanut unammisartunut sungiusaasuussaaq Bent Petersen, Inunnguaq Geronne sungiusaasooqataassalluni.

Arnat nunanut allanut unammiartinnissaannut periarfissat maanna misissorneqarput. KAK arnallu ineriartortinnissaannut ataatsimiititaliaq isumaqarput, arnanut silami arsaannermit futsalimi nukittunerusinnaasut.

Nunanulli allanut unammisartunik arnani pilersitsissagaanni, arnat arsaattartut amerlanerusut pisariaqartinneqarput.

- Ajornartorsiutip ersarissarnissaa pisariaqarluinnarpoq, arnanimi niviarsiaqqanilu ineriartortitserusukkutta taamaaliortariaqaratta. Elite Sport Greenland suleqatigalugu futsalimi arsaannerup iluani ilinniartitsissutinik inerisaavugut, KAK-mi siulittaasup tullia aamma arnat ineriartortinnissaanut ataatsimiititaliami siulittaasoq, Lisa Ivalu Lind, tusagassiorfinnut nalunaaruteqarluni oqarpoq.

Angutit Island Gamesimut

Angutit futsalimik nunanut allanut unammiartartut kisimik nunanut allanut unammiartarallartut, Kalaallit Arsaattartut Kattuffiat ilisimatitsivoq.

KAK-mili siulersuisut nutaat arnat futsalimi silamilu arsaallutik nunanut allanut unammiartartut pilerseqqikkusuppaat. Aningaasaqarnikkulli unammilligassat pissutigalugit angutit kisimik Island Gamesimut aappaagu unammiassapput.

- Island Games aappaagu Guernseyimi ingerlanneqalerpat KAK peqataatitaqassaaq. Neriuutigaarpulli Kalaallit Nunaanni silami arsaanneq ineriartortinneqalissasoq. Island Gamesimi angusarissaarnissaq neriuutigaarput, siulittaasoq Finn Meinel oqarpoq.

KAK-p nuannaarutigaa kommunit arlallit silami ivigaasaaqqanik arsaattarfinnik pilersitsiortormata. Tamanna silami arsaannerup ineriartortinnissaannut tunngaviliisoq, nalunaaruteqarluni allappoq.