Futsalertartut Sverigemi unammisartunngortut
Niklas Thustrup Johansen aamma William Gantzhorn Sverigemi timersoqatigiiffimmi Lidköping United Futsalimi unammisartunngorput. Kalaallit amerlanerusut timersoqatigiiffimmi unammisartunngorsinnaanerat timersoqatigiiffimmit ammaffigineqarpoq.
Futsalimi nunanut allanut unammisartut, 19-nik ukiulik Niklas Thustrup Johansen aamma 18-inik ukiulik William Gantzhorn, Sverigemi Lidköping United Futsalimi unammisartunngorput.
Nunanut allanut unammisartunut sungiusaasuusimasumit Tekle Ghebrelulimit sungiusarneqassapput.
Takorluukkap piviusunngornera
Lidköping United Futsalimi unammisartunngortut Sermitsiaq.AG-mit oqaloqatigineqarput
- Meeraallungali takorloortarnikuuvara nunani allani arsartartoorusullunga taamaammat aamma arsarneq pimoorunnikuuara meeraallungali, Niklas Thustrup Johansen oqarpoq. Taanna Ilulissani Nagdlunguami unammisartuunikuuvoq.
Napparsimmavimmi uninnganeq
Unammeqatigisalertagassani sungiusaqatigisalernissai qilanaaraa. Septembarip aallartinnerani sungiusaqatigiinnerit aallartissapput.
- Naatsorsuutikka qaffasitsippallaanngilakka. Sapinngisara tamaat arsarusuppunga, aamma una aasaq aakilliorlunga napparsimavimmi unannganikuugama sungiusarnissara killeqarnikuuvoq. Kisianni aaqqikkama utoqqatissutiginagu eqqissillunga timersorneq aallarteqqippara taamaammat arsariaaseq allarujussuusinnaasoq pulaffiginissaa qilanaaraara sapinngisaralu tamaat klubimut tunniusserusullunga, oqaluttuarpoq.
Niklas Thustrup Johansen arsaaffimmi sukkasuujuvoq, sukataallaqqilluni ilaatigut peqqarniilaarsinnaasarluni.
- Tunniusimanera peqqutaanerpaagunarluni Lidköping Unitedimut ilanngukkunarpunga aamma pikkoriffikka atorlugit sassarusuppunga Ligatinnilu ajugaarusullunga holdimut takutikkusuppara. Aamma una periarfissaq pisimasarput atorluarusuppara anginermut ingerlariaqqikkusullunga, kisianni soorunami tamanna piffissap takutikkumaarpaa, oqarpoq.
Ineriartornissaq
Siornatigut B-67-imi Young Guns Futsalimilu unammisartuusimasoq William Gantzhorn klubbimi tassani aamma unammisartunngorpoq.
- Futsalertartutut ineriartoqqikkusuppunga. Maannakkut qaffasinnerusumi unammisartuulernissara ilisimavara, tamanna iluaqutaassasoq naatsorsuutigaara, oqarpoq. Taanna Holbæk Sportsakademimit Sverigemut nuuppoq.
Meeraasulli nalunngilai
Sungiusaasuata Tekle Ghebrelulip unammisartuutissani meeraasulli ilisimallugit oqarpoq.
- Unammeriaatsikkut assigiinngitsuupput, piginnaaneqarluarput ineriartorluaqqissinnaallutillu. Ingerlariaqqinnissartik qunuginagu ingerlariaqqipput. Niklas Williamilu tatigaakka, kisianni sukataartariaqarput. Sungiusarnerni unamminernilu takutitsilluartariaqarput, oqaluttuarpoq.
Kalaallit futsalertartut allat klubbimi unammisartuulernissaat ammaffigineqartoq oqarpoq.
- Unammisartut ingerlariaqqinnissamut qunugisaqanngitsut pikkorissullu periarfissikkusuppagut. Unammisartut amerlanerusut periarfissamik tigusissasut neriuutigaara. Kisianni arsallaqqissuseq kisimi apeqqutaassanngilaq. Eqqarsartaatsikkut piareersimanngikkaanni unammisartuulertoqarsinnaanngilaq. Inuttut aalajangersinnaassuseqartoqartariaqarpoq nunami allami unammisartunngorusukkaanni, Lidköping United Futsalimi sungiusaasoq Tekle Ghebrelul oqarpoq.