Futsalertartunut piukkunnaatilinnut suliniut nutaaq

Nunatsinni unammisartut piukkunnaatillit amerlanerusut ineriartortinniarlugit Kalaallit Nunaanni Arsaattartut Kattuffiat annertuumik suleqatigiinnissamik Elite Sport Greenlandimik isumaqatigiissuteqarpoq, tassani unammisartut pitsaanerpaat 16-25 akornanni ukioqartut ukiumut ataasiarlutik pingasoriarlutilluunniit naapitsittalerlugit.

Timersortartut kattuffia piukkunnartunik ineriartortitsinermut aningaasanik tapiissuteqassaaq.

GBU-p siulittaasuata, John Thorsenip, suleqatigiinnermik isumaqatigiissuteqarnikkut arsaattartut ukiukitsillugit annaaneqartannginnissaasa anguneqarnissaa kissaatigaa.

Aallussilluni sulineq
Sumiiffikkaartuni katersuutsitsinerit nunanut allanut unammisartunik katersuutsitsinernit akikinnerupput, taamaattumik unammisartut piukkunnaatillit pitsaassusermik qaffasinnerusumik klubbiminni nunanut allanut unammisartunut sungiusaasunit takuneqarnissaminnut periarfissaqarnerussapput.

- Qasujaassusermik, unamminermik taktikkikkut paasinnilluarsinnaanermik aamma ineriartornissamut piumassuseqalernissaq aallussilluni suliniutigineqassapput, kisianni aamma najukkami aqutsinernut ineriartortitsisoqassaaq, nunanut allanut unammisartunut sungiusaasut Tekle Ghebrelul aamma Rene Olsen oqarput.

Atuaruk: Isikkammik arsaanneq annertusiniarlugu suleqatigiinnermut isumaqatigiissut

Katersuunneq siulleq ullumi aallartippoq
Sumiiffinni katersuunnernut unammisartut peqataaut sungiusarnermut pisussaaffeqartarput (sapaatip-akunneranut pingasut tallimariarlutilluunniit) ukioq naallugu, kiisalu taakkununnga malittarisassat malinneqassapput, taakku nunanut allanut unammisartut sungiusaasuisa siunissami toqqaanissaannut tunngaviit annertusissavaat.

Sumiiffinni unammisartunik 2016-imi katersuutsitsinermi timersoqatigiiffiit sungiusaasuilu suleqatigalugit pissaaq. Tassani unammisartut 22-25 akornanniittut peqataapput.

Katersuunneq siulleq Kujataani septembarip 9-anit 11-ata tungaanut Qaqortumi pissaaq. Tamatuma kingorna sungiusaasut septembarip 23-ani 25-ata tungaanut Ilulissaniissapput.

Atuaruk: Kalaallit arsaattarnerannut millionilikkaanik tunniussivoq