Futsal: Arnat nunanut allanut unammisartut sungiusaasortaartut
Arnat futsalimik arsaallutik nunanut allanut unammisartut qaammatini sisamani sungiusaasoqanngereerlutik maanna sungiusaasortaarput. Sungiusaasunngortoq arnanut, inuusuttunut niviarsiaqqanullu sungiusaasuussaaq.
David Bror Janussen nunatsinnit arnat futsalimi arsaallutik nunanut allanut unammisartunut sungiusaasunngorpoq. Sungiusaasuerunnermit qaammatit sisamanngoreersullu arnat taamaasillutik sungiusaasoqaleqqipput.
Kalaallit Arsaattartut Kattuffiat tusagassiorfinnut nalunaaruteqarluni ilisimatitsivoq David Bror Janussen arnanut, inuusuttunut niviarsiaqqanullu futsalimi sungiusaasuussasoq.
- Davidip toqqarneqarneranut pissutaavoq ukiuni kingullerni futsalimi sungiusaasutut inissisimanermini angusai pitsaammata kiisalu naqqaniit ukiuni arlaqartuni aallussisinnaanini, ineriartortitsisinnaanini pitsaasumillu angusaqarsinnaanini takutikkamiuk, KAK tusagassiorfinnut nalunaaruteqarluni allappoq.
David Bror Janussen angutit futsalimik arsaattartut U19 siornatigut sungiusaasuuffigereerpai.
Niviarsiaqqat AWG-mut unammiassapput
Arnat nunatsinni pissartanngorniunnissaat sapaatip akunnerani 14-imi pisussaq nallerluinnartorlu, sungiusaasumik toqqaasoqarpoq. Niviarsiaqqat U15-it sapaatip akunnera una pissartanngorniupput.
Arctic Winter Games 2023 naammassereersimatsiaraluartoq, KAK-ip holdit sorliit tulliani AWG-nissamut aallartissallugit maanna isumaliutersuutigereersimavaa.
- Niviarsiaqqat tulliani AWG-mut futsalimi unammeqataanissaat siulersuisut aalajangerpaat, sulili aalajangerneqanngilaq U14 imaluunniit U16, sorliit peqataassanersut. David AWG-mi tullermi peqataassaaq sungiusaasuulluni tassungalu piareersaasiornissat aamma ingerlatileriissallugit. KAK ilisimatitsivoq.
Sungiusaasunngortoq ukiuni tallimani sungiusaasutut isumaqatigiissuteqarpoq, niviarsiaqqat arnallu futsalimi arsaattartut ataavartumik inerisarneqarnissaat pillugu.
Peqatigiiffiit siuarsarneqassasut
- Kommunemi nunaqarfinnilu timersoqatigiiffiit peqatigaligit qaneq siuarsaanissaq ataatsimoorluta naapittariaqarpugut, David Bror Janussen tusagassiorfinnut nalunaarummi oqarpoq.
David Bror Janussen sungiusaasutut nunatsinni futsalimi peqatigiiffiit nukittorsarnissaat siuarsarnissaallu aamma siuttuuffigissavaa.
Sungiusaasortaap anguniagai takorluugaalu pillugit apersussallugu Sermitsiaq.AG sulissuteqarpoq.