futsal
Futsal-landsholdit siuttuusut
Futsal-landsholdit Danmarkimi sisamakkaarluni unammineq kingulleq aamma ajugaavaat
Arfininngormat ualikkut Malmø City Futsal aamma København Futsal ajugaaffigereerlugugit, sapaammi FC Fjordbold unammineqarput. FC Fjordbold danske Liga Østimi København Futsal assigalugu arsartarput.
Unammisat artornartut
Kalaallit nunanut allanut unammisartui arfininngormat marloriarlutik ajugaareermata FC Fjordbold mianersoqquneqareerput. Illersuinerusumik arsaaffimmilu tunuarsimanerullutik arsarput.
Naak FC Fjorboldip minutsialuit ingerlareersut unamminermi isertitseqqaaraluartut, periaaseq allanngunngilaq. Kalaallit arsaq tigummineroqaat piffissamilu sivisuumi unamminermi aqutsillutik. Sungiusaasoq René Olsen Sermitsiaq.AG-mut ersarissumik oqaaseqarpoq:
Unammineq tukattoq
- Unammineq tukakujuppoq. Kukkussutitsinnik isertitsineranni qujanartumik uniinnarata ileqqorissaarnermik takutitsivugut. Piniinnavippugut, unammisattalu nalunngilaat malinnaasinnaanatik, taamaammallu aquinnavikkigut malugisinnaavarput. Naak piffissap ilaani sinilertuusisaraluarluta, arfininngormallu unamminerit marluk suli malugeqqagaluarlugit. Qasujaassutsip tungaatigut angusinnaanngilaatigut, malinnaaffigisinnaanata nalunngikkaat ersarippoq, sungiusaasoq oqarpoq.
- Qularnanngilarli unamminerni pingasuni takutitsinerput naammaginartorujussuuvoq. Holdit pimoorussisut aamma pissanganartut suliffigaagut, René Olsen nangippoq.
Kalaallit isertitsisut:
- Frederik Funch 2
- Niklas Thorleifsen 1
- Ari Hermann1
- Nikki Petersen 1
Nuannaarnerup ajoqutaa
Marloriarluni isertitsisoq aamma unammisartut pikkorinnertaasa ilaat, Frederik Funch, seeqquminit ajoqusernerluni unamminermit anisariaqarsimavoq. Maanna misissuinerit takutikkallarpaat, Frederik Funch sapaatip-akunnerini arfinilinni arsanngikkallassasoq.
Tamannalu ajoraluartumik isumaqarpoq, Kalaallit Nunaat nukittunerpaamik inissitsiterneqarsinnaanngilaq Danmarki Nuummi 6., 7. aamma 8. november unammilerunikkit.
Nunanut allanut unammisartut ullumikkut ataasinngornermi Nunatsinnut utissapput.
Assit takukkit: Futsalimik nunanut allanut unammisartut unamminerni siullerni marlunni ajugaapput