Arctic Winter Games
Futsal-ertartut salliutinneqarput
Futsalertartut Arctic Winter Gamesimi sapaammi unammeriissapput. Taamaattumik ilaasunik timmisartuusseqattaarnissami, nalunaaqutaq 11.20 aallartittussami, siulliunneqassapput
Sapaatiummat ullaakkut Air Greenlandip ilaasut allattorsimaffii allanngortiterpai, futsalertartut sapinngisamik siusissukkut Kangerlussuarmit aallartinniarlugit, Arctic Winter Gamesimi Nuummi ingerlanneqartumi unamminissaannut angumersitinniarlugit.
Timmisartortitseqatigiiffiup Nuummut timmisartuussinissai siulliit marluk nalinginnaasuupput, ilaasut kinguaattooqqasut timmisartuullugit. Nalunaaqutarlu 11.20 Kangerlussuarmiit timersortartunik timmisartuusseqattaarneq aallartissaaq, tamannalu ataasinngornerup ullaavata tungaanut ingerlanneqassaaq.
Silarlummik eqqugaasut
Arctic Winter Games tallimanngormalli silarlummik ajornartorsiuteqarput, siullermik anorersuarneranik kingornalu Nuummi aperujussuarneranik. Timmisartuusseqattaarnissallu sapaammi ullaap tungaanut kinguartinneqarnerannut pissutaavoq suli anorsaarnera aperatarsinnaaneralu.
Pilersaarut malillugu ammaanersiortoqassaaq
Arctic Wnter Gamesimilli aqutsisut aalajangiusimavaat ammaanersiorneq sapaammi nalunaaqutaq 20.00 pissasoq, peqataasussat tamarmik apuutereersimanavianngikkaluartut.
– Aporfissaqakujussimaqigatta, general manager Maliina Abelsen tusagassiorfinnut nalunaarutikkut erseqqissaavoq.
Sapinngisamik amerlanerpaat peqataassapput
– Qujanartumik kajumissutsiminnik sulisoqarpugut suleqateqarlutalu ulloq unnuarlu ulapittunik. Air Greenland suleqatigalugu timmisartuussinissat aammalu timersornikkut kulturikkullu pisussat allanngortikkatsigit tamatumuunakkut Arctic Winter Games tamarmi sunnerneqarpoq. Isumaqaraluarlunga pingaaruteqartoq inuusuttut timersortartut maanngaannit sapinngisamik annertunerpaamik pissarsinissaat, timersornikkut, kulturikkut peqatigiinnikkullu, taava programmi aallartittariaqarparput. Taamaattumik maannakkorpiaq allanngortiterivugut, aallartitalli ataatsimut isumaqatigiissuteqarfigereerlugit sapaammi nalunaaqutaq 20.00 ammaanersiornissaq aalajangiusimavarput, taanna oqarpoq.