Post Greenland
Frimærkit nutaat saqqummersinneqartut
Saqqummiussat frimærkinik arfineq pingasunik, arkinik mikisunik pingasunik, arkinik mikisuaqqanik marlunnik, frimærkinut mappersakkamik ataatsimik, tammajuitsussatut mappimik kiisalu ullormi saqqummiussiffimmi naqitanik ilaqarlutik.
Frimærkinik nutaarluinnarnik Post Greenlandi ullumi, ataasinngornermi, saqqummiussivoq
- Frimærkini sammisat assigiinngitsunik sammisaqarfiupput, Kalaallit Nunaanni kulturikkut oqaluttuarisaanermik aamma ullutsinni pisunik sammisaqarfiullutik, Post Greenlandi tusagassiuutinut nalunaarummi allappoq.
Buuti Pederseni 1995-imiilli Post Greenlandimut frimærkiliuussisalerpoq.
- Taamaalilluni taanna 2017-imi Europa-frimærkiliatsinnik marlunnik suliaqartuuvoq. PostEurop-imi ataatsimoorussamik sammisaq tassaavoq: Illussaarsuit. Buutip suliassaq tamanna eqqumiitsuliornikkut Kalaallit Nunaannut atassuserlugu qanoq naammassineraa frimærkit taakku atorlugit saqqummiutissallugu qilanaaraarput. Taakku arkinut ilivitsunngorlugit aamma nipitittaganngorlugit arkit mikisunngorlugit, kiisalu mappersakkanut nipitittaganngorlugit saqqummiunneqassasut, paasissutissiarineqarpoq.
”Stationit avinngarusimasumiittut” nangeqattaartumik saqqummiussassanut nutaanut qulequtsiussaavoq, Kalaallit Nunaanni sumiiffinni avinngarusimasumiittuni assigiinngitsuni stationit ullumikkut oqaluttuassartaannik samminniffiulluni.
- Stationit avinngarusimasumiittut oqaluttuassartaat frimærkitigut oqaluttuariniarlugit ilaatigut Nunatta Katersugaasivia Allagaateqarfialu aamma eqqumiitsuliortut arlallit suleqatigaavut. Frimærkit arkinut ilivitsunngorlugit saqqummiunneqassapput, offsetimillu naqinneqarlutik, tusagassiuutinut nalunaarummi erseqqissaatigineqarpoq.
Aningaasatoqqat
Nangeqattaartumik saqqummiunneqartartussaq alla tassaavoq ”Aningaasatoqqat”. 1900-kkut aallartisimalerneranni KGHmi, Kongelige Grønlandske Handelimi, aningaasat immikkuullarissut atorneqarput. Taakku stentryk atorlugu suliarineqartarput, aammalu Kalaallit Nunaanni niuertoqarfinni atorneqarsinnaanikuullutik. Bertil Skov Jørgensen eqqumiitsuliortuvoq taakkuninnga titartaallunilu kigartuisoq. Frimærkit offsetimik lasergravuremillu naqitaapput, arkinullu ilivitsunut mikisunullu suliaralugit saqqummiunneqassallutik.
- Ukioq manna Sepac-frimærki sammisaq ”Najukkami atortussat kusanartuliat” malillugu saqqummiunneqassaaq. Europami allakkeriviit mikisut suleqatigiiffianni ilaasortat 13-it tamarmik frimærkinik nangeqattaartumik saqqummiussassanik taakkuninnga 2017-imi saqqummiussissallutik aalajangiuppaat – ataatsimoorussamik sammisamut tassunga. Uagut Sepac-frimærkerput puisip amianik kavaajaq arkitut ilivitsutut saqqummiunneqassaaq, aammalu offsetimik naqinneqassalluni.
Ukiut 50-inngorlugit katiffissiorneq
Kunngikkormiulli aappariit ukiuni 50-inngortorsiorlutik katiffissiornissaat malunnartinneqarniartunut ilaatinneqarput.
- Post Greenlandip, Posta Faroe Islandip aamma PostNord Danmarkip kunngikkormiut ukiut 50-nngorlugit katiffissiornissaannut atatillugu Naalagaaffeqatigiittut ataatsimoorussamik saqqummiussinikkut malunnartinniarsinnaagamikku nuannaarutigaat. Allakkeriviit taakku pingasut tamarmik taamaalillutik kunngikkormiut assingi kusanartut mikisunik arkinngorlugit saqqummersissavaat. Arkit mikisut Torben Eskerodip assilisaa malillugu eqqumiitsuliortumit Jakob Monefeldtimit suliarineqarsimasut, Post Greenlandi oqarpoq.
Post Greenlandip frimærki 20-nik mærkitalimmik ilivitsumik arkinngorlugu, kiisalu tammajuitsussatut mappimut kusanartumik ilusilerlugu aamma saqqummiutissallugu aalajangiuppaa.
Frimækit nutaat Post Greenlandimeersut una toorlugu takukkit