Frimærkit nutaat 24-t ukioq manna saqqummiunneqassapput
Kalaallit frimærkiliaanni tamani Kalaallit Nunaata kulturia immikkuullarissoq, pinngortitaq oqaluttuassartarlu takutinneqartarput.
Namminersorlutik Oqartussat ingerlatseqatigiiffiutaata Tusass-ip ukioq aallarnerlugu, Ataqqinartorsuup Dronningip ukiuni 50-ini naalagaaffimmi qullersatut ulloq 14. januar nalliuttorsiutigineqarneranut atatillugu immikkut frimærkiliaq saqqummiutissavaa.
- Frimærkip takutippaa Dronningi kusanaqisumik kalaallisoortoq kangerlummi iluliarasaartumi nunamillu tunuliaqutaqarluni issiasoq. Assiliartassanik titartaasartup kigartuisartullu ilisimaneqarluartup Martin Mörckip kigartugassap titartarnera aaqqissuunneralu suliarai Kunngikkormiunik assiliisartup Steen Brogaardip assilisaa malillugu, Tusass tusagassiorfinnut nalunaaruteqarluni allappoq.
Kunngissap nulia akunnaalliliissasoq
Ingerlatseqatigiiffiup katillugit frimærkit nutaat 24-t ukioq manna saqqummiutissavai, taakkunani Kalaallit Nunaata kulturia immikkuullarissoq, pinngortitaq oqaluttuassartarlu takutinneqassallutik.
- Arfininngornermi februaarip tallimaani Kunngikkormiuneersumik aamma saqqummiissaagut. Tassami Kunngissap nulia Mary ulloq taannarpiaq 50-inik ukioqalertussaavoq. Tamanna frimærkimik offsetitut naqitamik kusanaqisumik malunnartissavarput. Stine Heilmannip Kunngissap nulia kalaallisoortoq assilisimavaa. Tamanna alutornarluinnartunngorlugu frimærkiliarineqarsimavoq.
Nunat Avannarliit Killiit Siunnersuisooqatigiivi ukiunik 25-inngortorsiortut
Nunat Avannarliit Killiit Siunnersuisooqatigiivi ukioq manna 25-nngortorsiussapput. Kalaallit Nunaat siunnersuisooqatigiinni pingaarutilimmik inissisimavoq. Taamaattumik pisoq frimærkiliarineqarpoq malunnartitsinertut. Maria Panínguak’ Kjærulff assimik eqqumiitsuliortuuvoq. Saqqummiiffissaq ulloq tassaavoq 31. maj.
Kalaallit Nunaanni kakiuisarnerit
Kalaallit Nunaanni kakiuisarneq inuit piorsarsimassusaannik aallaaveqarpoq. Ukiuni kingullerni kalaallit kakiueriaasiat saqqumilaaqqilersimavoq pingaartumik inuusuttut akornanni, kakiornerminnik piorsarsimassutsimik malunnartitsisuusunik. Assilialiortartoq kakiuisartorlu Paninnguaq Lind Jensen nangeqattaartunik aallarniissaaq ulloq 31. august frimærkit kusanarluinnartut marluk aallarniutigalugit.