Skip to main content

Frimærkip tunineqarneranit isertitat Kalaallit Illuinut tunniunneqassasut

Post Greenlandip frimærkip nalinganut tapiliussaq aqangu ataasinngornermi saqqummiutissavaa, aningaasat isertinneqartut Danmarkimi Kalaallit Illuinut sisamaasunut tunniunneqassapput.

Frimærki kusanarluinnartoq Nunatsinnut kusanartumut isaarissatut isikkuligaq assilialiortartumit kalaallimik Letlandimiumillu angajoqqaalimmit Bolatta Silis-Høeghimit suliarineqarpoq, taassumalu tulluusimaarutigaa ukioq manna tapiliussatut frimærkimik suliarinnissinnaasimanini, Post Greenland tusagssiorfinnut nalunaaruteqaluni allappoq.

- Kalaallit Illui uannut tassaapput Kalaallit Nunaannut isaarissat. Suliassaq una aqqutigalugu paasivara Kalaallit Illui inooqataanikkut, kulturikkut, ilinniagaqarnikkut Kalaallit Nunaallu pillugu ilisimasaqarnerulernissamik suliaqarnermut tamarmut qanoq initutiginerat ataatsimuulersitsinerallu – Isumassuinikkut angeqisumillu maniguunnikkut. Uannut Københavnimi najugalimmut angerlalaarnertut misiginartarpoq ulluinnarni inuuninnut nukittorsaataasumik, tamannalu qujassutigaara, Bolatta Silis-Høegh oqarpoq.

Annertuumik suliaqarsimasut

POST Greenlandimi frimærkinut pisortaq Allan Pertti Frandsen saqqummiinermut atatillugu ima oqarpoq:

- Danmarkimi kalaallit illui sisamaasut Kalaallit Nunaannik kiisalu kalaallinik Danmarkimi najugalinnik ilisimasaqarnerulernissamik siammarterinerminni angeqisumik sulipput. Taamaattumik Kalaallit Illui taakku sisamat 2021-mi tapiliussatut frimærkip POST Greenlandimit saqqummiunneqartup nalingata katinneranik ataatsimoorlutik tigusisussatut toqqarneqarnerat pissusissamisoorpoq.

Odensemi Kalaallit Illuat kikkunnit tamanit malinnaaffigineqarsinnaasumik toqqaannartumik saqqummersitsinermut qaaqqusisuuvoq. Tassani eqqumiitsuliortoq Kalaallillu Illuini pisortat tamarmik oqalugiassapput, erinarsortartorlu nuannariisaasoq Nive Nielsen erinarsussalluni.

Nunatsinni nalunaaqutaq malillugu aqqanerniit ullup-qeqqata tungaanut saqqummiineq malinnaaffiginiarukku una iserfigissavat: https://www.sro.dk/frimaerke2021

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER