Frederik Elsner nersornaaserneqarnissamut innersuunneqartoq
Gaffap nersornaammut tunniuttagaanut Frederik Elsner ajugaasuussanersoq aalajangeeqataasinnaavutit.
Frederik Elsnerip saqqummersitaa 'Sikiinnarpugut' Danmarkimi nipilersornerup tungaatigut ilisimaneqarluartumut nersornaaserneqarnissamut innersuunneqarpoq.
Tassami saqqummersitaa 'Årets danske rock udgivelse'-itut innersuunneqarpoq, tassa ukiumi nipilersoriaatsimi rockimik saqqummersitatut pitsaanerpaatut innersuunneqarluni. Nersornaat Gaffamit tunniunneqassaaq.
- Innersuunneqarninnut tulluusimaaqaanga, tassami danskit nipilersortartut tusaamaneqarluartut aamma innersuunneqarput. Naak saqqummersitara kalaallisuinnaq erinaqaraluartoq innersuunneqarnera tulluusimaarutigaara, Frederik Elsner Sermitsiaq.AG-mut oqarpoq.
D-A-D saqqummersitaminnut A Prayer For The Loud-imut ukioq kingulleq nersornaaserneqarpoq. Siornatigut Kashmir, Dizzy Mizz Lizzy aamma Newphew nersornaaserneqareerput.
Taaseqataasinnaavutit
''Sikiinnarpugut' ukioq kingulleq saqqummerpoq, qulinik erinaqarluni. Frederik Elsner Gaffamit aamma qanittumi nalilerneqarluarpoq, nipilersornikkut piginnaasaqarluartoq ilaatigut nalilerneqarluni.
Frederik Elsner nersornaammik tunineqassanersoq aalajangeeqataasinnaavutit - Gaffap nittartagaani taasinissaq periarfissaavoq. Februaarip aqqaneq aappaata tungaanut taasisoqarsinnaavoq.
Nersornaat marsip sisamaani tunniunneqassaaq.