Frederik Elsner inuuissiornerminut atatillugu kisimiilluni nuussualiaminik saqqummiussilersoq
Frederik Elsner nipilersortartuni Nanookuuni peqataasarnermigut ilisarisimaneqarluartoq, aappassaanik kisimiilluni nuussualiaminik juulip 24-ani saqqummiussissaaq. Nuussualiaa uummaarissuuvoq nikallunnganarlunili, erinarsuutigineqarpullu skizofreni, silap pissusaata allanngoriartornera asanninnerlu.
Frederik Elsnerip nuussualiaani nutaami, taaguuserneqarsimasumi Sikiinnarpugut - Vi bøjer os bare - Kalaallit Nunaata oqaluttuarisaanerani pisimasut sakkortuut ilaat pillugit erinarsuutit tusarnaarneqarsinnaapput. Qanga pinngitsaalisaasumik nuutsitsisarsimanermit ullimikkut silap pissusaata allanngoriartorneranut tunngassuteqartut.
Erinarsortartup nuussualiaanut ukioq pisoqarfiusimaqisoq aamma coronap atugaanera ilusilersueqataasimapput.
- Isumaqarpunga saavata tamaasa nassuiarai. Ajoqusiisimanerpassuit atorsimavakka aamma corona suli naqqani sinneqarpasippoq. Maannali neriuuteqarneq siuninniippoq, Frederik Elsner Sermitsiaq.AG-mut oqaluttuarpoq.
Erinarsuutit allanneqartariaqartut
Taassuma oqaatigaa, inuunermi inuusuttutut inersimasutullu unammilligassaasimasut nuussuarmi erinarsuusiamini isumassarsiorfigisimallugit.
Nappaat skizofreni nuussuarmi sammineqartut ilagaat. Erinarsuut Skizo sanasimavaa, Tunumi nukappiaraq 17-inik ukiulik skizofrenimik nappaateqartoq, katsorsarneqarsimanngitsorli naapikkamiuk.
- Naapissimalereerluni misigisimavar, nukapiiaraq nappaatalu pillugit erinniortariaqarlunga. Erinarsuut taanna sukkasuupilussuarmik allappara, qanoq oqassallunga ilisimaqqissaarakku. Oqaasertai sakkortupput imminermimi parnaarussaasimaneq pineqarmat, Frederik Elsner oqarpoq.
Nipilersortartorpassuit peqataasut
Frederik Elsnerip nuussualiorneranut Savalimmiuni nipilersortartorsuaq - Teitur -pattagiarsorluni qarlortaasersorlunilu peqataavoq.
Angut alla nuannarineqarluartoq, nuussualiornermut aamma peqataasoq tassaavoq, Ole Kristiansen. Frederik Elsnerimmi ’Arnarulunnguaq’ pillugu oqaluttuaq nuannarineqaqisoq nanginniarlugu aalajangiussimavaa.
Erinarsuut ’Akornatsinniittuassaatit’, arnaq Knud Rasmussenip 1921-mi tallimassaanik avanersuarmut paasisassarsiorneranut peqataasoq pillugu oqaluttuamik nangitsineruvoq. Nipilersortartut taakku marluullutik erinarsuummik nutaamik immiusseqatigiissimapput.
Nuussuup aamma erinarsuut ’Sinnattoraangama Takusarpagit’ imaraa, Frederik Elsnerip pattagiarsornermik ilinniartitsisorisimasaanut Karl Sivertsenimut, toqukkut qimagussimasumut eqqaaniutitut erinarsortartorpassuarnit atorneqartoq.
Nuussuaq Frederik Elsnerip juulip 24-ani inuuissiornerani saqqummiunneqassaaq, erinarsuutinillu qulinik Frederik Elsnerip nipilersoriaatsimik ilisarnaatigisaatut sananeqarsimasunik imaqarluni. Nipilersortartulli neriorsuutigaa, nunani avannarlerni nipilersortartut Savalimmiuni Bloch Studiomi nipit pissutsillu nutaat atorlugit immiusseqataasimasut tusaaaneqarsinnaassasut.