Frederik albummimik nutaamik saqqummersitsingajalerpoq
"SIkiinnarpugut" aasamut saqqummernissaa naatsorsuutigineqarsinnaavoq. Erinaq ataaseq guitarertartuusimasumut, erinarsortartuusimasumullu Kâle Sivertsenimut ataqqinnilluni eqqaaniutaavoq.
Frederik Elsner aasamut 24. juli 34-inik ukioqalernissani pilersaarusiorlugu aallartereerpoq. Album nutaaq "Sikiinnarpugut" ulloq taanna saqqummersissavaa.
- Albumip ataqatigiitinnissaa pingaartissimavara. Ingammik taallat sammineqarnerupput tulluarsarlugit, eriniornikkut allarluinnartumik nipeqartussaalluni. Tusarnaartussat naatsorsuutigisinnaavaat nipit tungaatigut pitsanngoriarsimasoq, Frederik Elsner album saqqummersussaq pillugu nassuiaavoq.
Pulaartut arlallit
Guitarertartuusimasup erinarsortartuusimasullu Kâle Sivertseniugaluup taalliaa "Sinnattoraangama takusarpagit" Frederik Elsnerip immiuteqqissallugu aalajangersimavoq. Taassuma immiunnerani erinarsortartorpassuit nipilersortartorpassuillu aamma tusaamaneqarluartut peqataassapput.
Makku soorlu:
- Ole Kristiansen
- Mariina
- Nina
- Rasmus Lyberth
- Julie Berthelsen
- Naneruaq
- Inneruulat
- Tupaarnaq
- Mike Thomsen
- Sulilu amerlanerit. Tuppallernaqaaq peqataarusuttut taama amerlatigisimammata, tapersersueqataanertik takutillugu. Uannut isumaqarsimaqaaq, qilanaaqaangalu tusartsinnissaannut, Frederik Elsner oqarpoq.
Erinnamit "Sinnattoraangama takusarpagit"-mit isertitat Kâle Sivertsenip ilaqutaanut tunniunneqassasut, erinarsortartoq ilisimatitsivoq.
Pilersaarutit allanngortut
Coronap nalaani immiussiniarneq erinarsortartumut unammillernartoqarsimavoq, naleqqussapallannissaq pisariaqartarsimammat.
Erinarsuutip immiunnissaanut pilersaarutini siulliusoq tassaasimagaluarpoq erinarsortartut, erinarsoqatigiit soqutiginnittullu tamaasa Nuummi katersortarfimmut qaaqqullugit erinarsortinnissai. Pisussarli qanillilluinnartorlu coronaqartoqarnera pissutigalugu Nuummi suna tamarmi matuvoq.
Erinarsortartut arlalippassuit kingorna peqataassallutik aalajangerput, erinarlu ”Sinnattoraangama takusarpagit” immiuteqqeriarlugu Frederik Elsnerimut nassiuttarlugu. Taanna ilisimatitsivoq immiussinerit suli ingerlasut.
Frederik Elsner nipilersuutinik marlunnik videoliornissani aamma pilersaarutaa. Aappaani Ole Kristiansen pulaartuussaaq, aappaalu nunarsuup sequmikkiartorneranut tunngassalluni.