Franskit kalaallillu suleqatigiillutik titartakkanik isiginnaagassaliulersut
Frankrigip ambassadøria Carolini Ferrari Nuuk International Filmfestivalertoqarneranut atatillugu Kalaallit Nunaanniippoq. Titartakkanik isiginnaagassiortarneq pillugu workshoppertitsisimalluni.
Fanskit kalaallillu suleqatigiillutik, kalaallit oqaluttuaat tunngavigalugit, titartakkanik isiginnaagassiorniarput. Eqqarsaat tamanna Frankrigip Danmarkimi ambassadørianut, Carolini Ferrari-mut nutaajunngilaq.
Nuuk International Filmfestivalertoqarneranut (NIFF) atatillugu Kalaallit Nunaannut tikeraaqqammerpoq. Tassani titartakkanik isiginnaagassiortarneq pillugu workshoppertitsisimavoq, Frankrigep aallartitaqarfiata, NIFF-ip aamma Tysklandimi Goethe Institutip aaqqissugaannik.
- Kalaallit oqaluttuaat imartoorujussuupput. Titartakkatut isiginnaagassiassanngortissallugit piukkunnarluinnartutut isigaakka, Sermitsisaq.AG-mut oqarpoq.
- Workshoppertitsinermi pingaarnertut siunertaraarput inuit naapeqartigiissinneqarnissaat. Tamanna immininermini naleqarluartoq isumaqarpunga. Taamatut naapeqatigiissitsineq, kalaallit oqaluttuaat tunngavigalugit titartakkanik isiginnaagassiornermik malitseqarsinnaavoq, Caroline Ferrari oqarpoq.
Piorsarsimassutsikkut suleqatigiinneq
Taassuuma nassuiaatigaa, taamatut suliniuteqarnissamut aallarnisaalluni suli sungiusartoqartoq, aallaqqaammulli inuit suleqatigiissinneqarnissaat pineqartoq.
- Taamatut suleqatigiissitsiniarneq iluatsissappat, Kalaallit Nunaanni Europamilu filmiliortarnermut pingaaruteqarluinnartuussasoq isumaqarpunga.
- Nuannaarutigilluinnarparalu maani workshoppertitsinissaq ammarsinnaangakku. Frankrigemimi piorsarsimassutsimut tunngatillugu suleqatigiinnissamik kissaateqarnitsinnut tamanna naapertuulluinnarmat, ambassadøri oqarpoq, innersuussutigalugulu Frankrigemi ilisimatuut allaatiginnittartullu ukiorpassuarni Kalaallit Nunaannik soqutiginnissimanerat.
Assersuutigalugu Paul-Emile Victor 1948-p 1953-illu akornanni sermersuarmik Eqip eqqaaniittumik misissuisimavoq.