Franskit ingerlatseqatigiiffiat uranimik misissuinissamut akuerisaavoq
Kuannersuarni suliniut pillugu oqallinnerup ingerlaleruttornerani, franskit ingerlatseqatigiiffiat Orano SA uranimik misissuinissaanut Naalakkersuisut akuersissuteqarfigaat.
Franskit ingerlatseqatigiiffiat Orano Mining Limited Kujataata kitaani aamma Kujataata kangiani sumiiffiit marluk uranimik ujaasiffiginissaanut inniminneqqammerpai. Akuersissutilli immikkut piumasaqaatitalimmik tunniunneqarput, ingerlatseqatigiiffik ingerlaannaq piiaanissamut akuersissummik pisinnaanermik naatsorsuuteqarsinnaanani.
- Misissuinissamut akuersissut naalakkersuisoqarfinni assigiinngitsuni kujataanilu kommunimi tusarniaaffigineqarnikuuvoq, ingerlatseqatigiiffiullu piumasaqaatit immikkuullarilluinnartut misissuinissamut akuersissummut ilaasut akuerai, aatsitassanut naalakkersuisoq, Jens-Frederik Nielsen, Sermitsiaq. AG-mut taama ilisimatitsivoq.
Sumiiffiit
Sumiiffik ataaseq uranimik misissuiffissaq Arsuup Kangilinnguillu avannaani 1.042 kvadratkilometerisut angissusilimmi pissaaq. Sumiiffiup aappaa 2.485 kvadratkilometerisut angissuseqarpoq, sumiiffinnilu immikkoortuni marlunniippoq, Ilulinip aamma Paatusup kangerluini aamma Kangerlussuatsiami.
Frankrig Europami nunani atomimik ingerlatilinnik nukissiorfeqarnerpaavoq, Oranolu nunarsuarmi sumiiffinni arlalinni uranimik piaaffinni suliniuteqarpoq, taakku nukissiorfinnut atomimik ingerlatillit ingerlanneqarnissaannut qulakkeerisuupput. Franskit naalagaaffiata ingerlatseqatigiiffik aquppaa.
- Misissuinermut akuersissutip, assersuutigalugu misiliutigalugu qillerinissamut pisinnaalersippai, isumannaallisaanermut peqqissutsimullu piumasaqaatit malillugit, Jens-Frederik Nielsen nassuiaavoq.
Pisariaqartitsineq annertooq
Franskit uranimik nutaamik nassaarnissamut pisariaqartitsinerat ima annertutigaaq, piiaanissamut akuersissummik qinnuteqarnissamut qulakkeerneqarnani misissuinermut akisuumut aningaasanik atuinissamut piareersimasoqarluni.
- Ingerlatseqatigiiffik iluatsitsilluni uranimik nassaassaguni, taava ingerlatseqatigiiffiup piiaanissamut akuersissummik tunineqarnissaanut periarfissinneqassanersoq Namminersorlutik Oqartussanut naalakkersuinermillu suliaqartartunut apeqqutaassaaq, Naalakkersuisunut ilaasortat arlallit Greenland Minerals peqatigalugu Kujataanut innuttaasunik ataatsimiititsisartulerneranni, Jens-Frederik Nielsen suliap ingerlanera pillugu taama oqarpoq.
Kuannersuarni suliniummut Greenland Mineralsip saffiugassanik qaqutigoortunik piiaaffiginiagaanut aamma atortussanik radioaktiviusunik saniatigut tunisassiariniagaanut sanilliullugu, Oranop misissuiffissai inoqarfiusunut ungasissumi inissisimapput.
Nunarsuarmi uranisiorfiit
Oranop nittartagaani atuarneqarsinnaavoq, Canadami uranisioreersut, Nigerimi nunap immikkoortuani inoqajuitsumi aamma Kasakhstanimi uranisiorfiit annersaanni piiaasut. Ingerlatseqatigiiffik nunarsuaq tamakkerlugu 16.000-nik sulisoqarpoq.