Skip to main content

Foodlab piareersarneqartoq

Nuuk FoodLab piffissamut misileraaffiusumut piareerpoq ungasinngitsukkullu suliniut periarfissarpassualik aallartissalluni.

Kommunimit suliniut sivisuumik utaqqineqarsimasoq aallarnisaasut nammineq atortussaqanngitsut iggavimmi inuussutissanik suliarinniffiusussatut akuerisami ineriartortitsinissaannut periarfissiisoq piareeraluttualerpoq.

Atortunit nerisassanik tunisassiornerup iluani ingerlatat suugaluartulluunniit ammaassivigineqassapput. Kuanninik marmelademininnguamik sananiaraanni, tuttut neqaannik pølsiliat suliariniaraanni poortorniaraannilu imaluunniit puisit neqaannik uullinermik pikkorissaalluni workshopperniaraanni apeqqutaanngilaq, takorluuisinnaaneq kisimi killiliivoq.

Immikkut tunisassiornissamut periarfissiisoq

Aallarnisaasut namminersortut mikisut iggavimmi inuussutissanik suliarinniffiusussatut akuerisaasumi tunisassianik suliaqarnissamut periarfissinneqarnerisigut taakkua aamma tunisassiaminnik tuniniaanissamut periarfissinneqassapput.

Tamatuma kinguneranik sushilianik internettikkut, marmeladenik umiarsuarnik takornariartaatinut ilaasunut imaluunniit tunisassianik
pisiniarfinnik tuniniaqqinneqarsinnaasunik tunisassiorneq inatsisinik unioqqutitsinani ingerlanneqarsinnaalissaaq.

Pisisussat piareersimasut

Kommuni Pisiffimmut, Brugsenimut niuertunullu allanut arlalinnut najukkami tunisassianik nioqquteqalerusulluinnartunut aqqutissiuussisimavoq.

Taamaattumik najukkami tunisassianik, aallaqqaammuugallartoq tunisassiorferujussuakkooqqaartariaqanngitsunik, suliarinnittoqarsinnaalernissaanut periarfissamik takkuttoqarnera aamma niuertunut iluaqutaassaaq.

Pinnguartarfik aallarteriarfissatut

Iggavik nerisassanik suliarinniffiusoq taaguuteqassaaq Nuuk FoodLab, eqqarsaatigineqarsimallunilu aamma sumiiffittut aallarnisaasut nutaat isumassarsiaminnik annertusaallutik namminerisaminnik suliffeqarfiliulersinnatik misileraasarfissaattut.

Soqutiginnittut arlallit nalunaareersimapput aallartinnissamullu utaqqiinnalerlutik.

Misiliineq aallartissutigineqassasoq

Iggavimmik misiliisussat siulliit maanna aallarteriilerput. Soqutiginnittut arlallit misiliiniarlutik nalunaarsimapput. Suut tamarmik qanoq ingerlasinnaanerannik, suut amigaataanerannik qanorlu iliorluni pitsanngorsaasoqarsinnaaneranik nalunaaruteqarumaarnerat isumaavoq.

Iggavik pisortatigoortumik septembarip 2-ani ammarneqassasoq naatsorsuutigineqarpoq, tamatumanilu borgmester Charlotte Ludvigsen iggavimmik atoqqaartitsisuussalluni.

- Borgmesteritta nammineerluni paarnanik marmeladelioriartornissaa utaqqisinnaanngingajappara, Kommuneqarfik Sermersuumik siuariartortitsinermut piujuaannartitsinermullu pisortaq, Emil Skjervedal, oqaluttuarpoq.

Atuisunit ingerlanneqassasoq

Iggavimmut pedelimik aalajangersimasumik attuumassuteqartitsisoqassanngilaq, atorneqarneratalu nalaani nakkutilliisoqassanani. Atuisut namminneq atuinermik kingorna ininik eqqiaaneq isumagisassavaat iluarisassaqaleraangallu nalunaarutiginnittassallutik. Tamatuma kinguneranik iggaviup qanoq sumullu atorneqarnissaanut qanorlu eqqiarneqarnissaanut
ersarilluinnartunik maleruagassiortoqarlunilu suleriaasiliortoqassaaq.

Tamatuma akerlianik nalunaaqutsersueriaasiliortoqassaaq atorneqarsinnaasumik nioqqutissat Nuuk Foodlabimit suliarineqarsimatillugit, taamaalilluni tamakkua pissutsini aaqqissuussaasuni suliarineqarsimanerat inunnit takuneqarsinnaasassaaq.

Paasisaqarnerorusuppit

Soqutiginnittut nerisassiornermik suliniummik pilersaaruteqartut, isumassarsiaqartut, misilikkusutaminnik imaluunniit Nuuk Foodlabimik tamatumunnga qanoq atuisinnaanerminnik
siunnersorneqarfigerusutaminnik maannangaaq suliniummut aqutsisoq Jula Maegaard-Hoffmann attaveqarfigisinnaavaat una aqqutigalugu: foodlab@sermersooq.gl.

Iggaviup atornissaanut paasissutissanik pissarserusukkaanni aamma Jula attaveqarfigineqassaaq. Iggavimmik atuinissamut inniminniisarnissanut inniminniisarfimmik nittartagaliortoqassaaq, tassanilu iggaviup kikkunnit qaqugukkut atorneqarnissaa takuneqarsinnaassalluni. Taamatuttaaq init takuniarnissaannut Jula maannangaaq isumaqatigiissuteqarfigineqarsinnaavoq.

Sermersooq: Inissiat kommuninut tunniukkallarsigit
2019-imi Nuummi innuttaasut 2018-imut sanilliullugu 400-t sinnerlugit amerleriarput. Innuttaasut amerliartornerat ilutigalugu, Namminersorlutik Oqartussat inissiaataat 108-t atorneqanngillat. Tamanna...
Qatserisarfik qatserisartuni aalajaatsut pillugit nalliuttorsiorpoq
Ukiuni 40-ni kingullerni qatserisartut aalajangersut Nuumminngaanneersut illoqarfiit pingaarnersaanni ikuallattoqalersillugu orniguttarput qamiteriartorlutik, inuunermillu annaassiniariartorlutik....
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER