Folketingip ataatsimiititaliaa nunaqarfimmukassasoq
Kalaallit Nunaannut Ataatsimiititaliami ilaasortat tallimanngorpat Nunatsinnukassapput, ilaatigullu politiit eqqartuussiviullu sinniisuinik ataatsimeeqateqassallutik.
Danmarkip naalagaaffiata Nunatsinni akisussaaffiisa annertuut ilagaat politiit eqqartuussivillu, Kalaallillu Nunaannut Ataatsimiititaliap Nunatsinnut tikeraarnerani taakku pingaarnerutinneqarniarput.
Ataatsimiititalip tikeraarnini tallimanngorpat Nuummi aallartissavaa, Nunatsinniillu folketingimi ilaasortaatitat marluk Aaja Chemnitz Larsen (IA) ataatsimiititaliami siulittaasuusoq aamma Aki-Mathilda Høegh-Dam (S) aallartitanut peqataassapput.
Politikkerit tikeraarnerminni Nunatta Illersuisuunera Finn Meinel naapissavaat, Kalaallit Nunaanni Eqqartuussivik pulaassavaat aamma dommeriuneq Stig Nørskov-Jensen ataatsimeeqatigissavaat kiisalu Kalaallit Nunaanni Politiit Nunatsinnilu Politiit peqatigiiffianit sinniisuutitat ataatsimeeqatigissallugit.
Nunaqarfiliarlutillu aalisariassasut
Ataatsimiititaliap kingusinnerusukkut pinerluuteqarsimasunik isumaginnittoqarfimmi aqutsisut pinerluuteqarsimasunullu inissiisarfimmi nakkutilliisut aamma naapissavaaat.
Politkkerit Nuummi inunnik naapitsinermik saniatigut nunaqarfimmut Kapisilinnukassapput, tassani kommunefogedi nunaqarfimmilu aqutsisut naapinneqassallutik.
Kapisilinnukarsinnaat arfininngorpamut pisusssanngortinneqarsimavoq, nunaqarfimmeereerunillu savaateqarfik Neriunaq ornissavaat, tassani savaatilik Angutimmarik Hansen naapissallugu.
Politikkerit ulloq naggaserlugu unnukkorsiutissaminnik namminneq aalisassapput, pisaat Qqooqqut Nuan-ip neriarniartarfiani iganeqassallutik.
NATO-p Atlantikup Avannaani Issittumilu suliai pillugit isumasioqatigiinneq
Ataatsimiititaliami ilaasortat tikeraarnerminni aamma suliffeqarfinnit sinniisuutitat, ilaatigut Kalaallit Nunaanni Sulisitsisuneersut Grønlandsbankenimeersullu naapissavaat.
Ataatsimiititaliami ilaasortat pingasunngorpat Ilisimatusarfimmukassapput, tassani Forsvarsakademip aaqqissuussaannik isumasioqatigiittoqassalluni. Isumasioqatigiinnermi NATO-p Atlantikup Avannaanni Issittumilu suliai sammineqassallutik.
Ataatsimiititaliami ilaasortat aamma Kofoeds Skolemut pulaassapput, tassani sociologi Steven Arnfjord kiisalu Isumaginninnermut Suliffeqarnermullu Naalakkersuisoq Mimi Karlsen (IA) naapinneqassallutik.
Ataatsimiititaliami ilaasortat tikeraarnerat sisamanngorneq aggustip 26-ata tungaanut sivisussuseqassaaq.