Folketingimut qinigassanngortittoq: Danskit aaqqissuussaanerat nunatsinnut tulluarsagaanngillat
Elvira Kuitse siullermeerluni qinigassanngortippoq Siumumiillu Folketingimut qinigassanngortippoq. Aaqqissuussaanerullu kalaallit naleqartitaannut ileqquinullu naleqqussarneqarnissaat pingaartippaa.
FOLKETINGIMUT QINERSINEQFolketingimut qinersinissaq qallingaluttuarpoq. Nutaarsiassaqartitsivimmi Sermitsiaq.AG-mi aqutsisut – saqqummiussinissaq tamallu oqartussaanerat tunngavigalugit – aalajangerput qinersinissap tungaanut nittartakkami Sermitsiaq.AG-mi qinersinissaq pillugu annertunerusumik saqqummersitsissallutik. Taamaammat aviisinit pisiarineqarsinnaasunit Sermitsiaq-mit aamma AG-mit allaaserisat tamakkiisut immikkut illuinnartumik iliuuseqarnikkut, nittartakkami tamakkiisunngorlugit saqqummersinneqassapput, illillu atuarsinnaajumaarpatit. Atuarluarna.
Danskit aaqqissuussaanerat kulturitsinnut, naleqartitatsinnut ileqqutsinnullu amerlasuutigut naleqqussagaanngilaq. Taamaakkaluartoq kinaassuserput eqqarsaatiginagu nunatsinni atorneqarpoq. Allattoqarfiit uagutsinnut naleqqussarneqassapput, taamaalilluta siunissami aaqqissuussaanerisassarput sulissutigisinnaassagatsigu, Elvira Kuitse, Siumumit Folketingimut qinigassanngortittoq taama oqarpoq.
Elvira Kuitse Tasiilameersoq Ilisimatusarfimmi inatsisilerituunngorniatut ilinniartuuvoq, siullermeerlunilu Folketingimut qinigassanngortippoq, tassani naalagaaffeqatigiinnermi aaqqissuussaanerup pitsaanerulernissaa sulissutiginiarpaa. Inuusuttuunermini ukiut ingerlanerini nunatsinni politikkip ineriartornera soqutiginartitaraa, siornatigullu partiit inuusuttaanni suliaqartarsimavoq. Maanna aaqqissuussaaneq kalaallit kinaassusaannut, kulturiannut naleqartitaannullu naleqqussarneqarsimanngitsoq, Elvira Kuitse isumaqarpoq.
Nunatsinni inuuniarnikkut ajornartorsiutit iliuuseqarfiginissaannut piffissanngorpoq, aaqqissuussaanerullu kalaallinut innuttaasunut naleqqussarneqarsimannginnera ajornartorsiummut qitiusoq isumaqarpunga. Kalaallit Nunaat nunarujussuuvoq, kisianni innuttaasut ikittunnguupput, avannaani, kujataani, kangiani kitaanilu kulturit assigiinngitsorujussuullutik. Illoqarfinnut anginernut eqiterutsitserusuttoqarpoq, kisianni kulturivut assigiinngitsut amerlammata kikkut tamarmik illoqarfinni anginerusuni najugaqarnissamut tulluanngillat, Elvira Kuitse oqarpoq.
Tamatta immitsinnut pisariaqartippugut
Taamaattumik aaqqissuussaanerup innuttaasunut kalaallillu kulturiinut, kinaassusaannut ileqquinullu naleqqussarneqarnissaa piffissanngorpoq, taanna isumaqarpoq.
Nunatsinni tamatta immitsinnut pisariaqartippugut, piginnaaninillit nukiillu tamaasa pisariaqartippavut, nukissallu aamma nunaqarfinni mikisuniittut. Ullumikkut ilinniartitaanermut piumasaqaatit amerlaqaat, innuttaasunullu piumasaqaatit annertusiartuinnarput, kisianni taamaaliornikkut inuuniarnikkut ajornartorsiutinik pilersitsisoqartarpoq, aaqqissuussaanerup innuttaasunut naleqqussarneqannginnera pissutigalugu.
Sivisuallaartumik paasineqarsimannginnatta maanna sassarpunga, tamannalu allanngortinniarpara. Inuusuttut politikerit amerliartuinnartut uattut anguniagaqarput, taakkulu suleqatigerusuppakka, Elvira Kuitse oqarpoq.
Elvira Kuitsep saniatigut Aki-Matilda Høegh-Dam, Karina Zeeb aamma Markus E. Olsen Siumumit Folketingimut qinigassanngortipput.