Folketingimut qinersineq: Pissanganartumik naligiitoqartoq
Exit Poll siulleq naapertorlugu nunatsinnit Folketingimut ilaasortanngortussat qitiusumik inissismalersinnaapput
Sunaluunniit nikeriarsinnaavoq. Sukkasoorujussuarmik. Maannakkorpiarli Exit Pollimit siullermit, qallunaat 9200-t qanoq taasisimanerannik tunngaveqartumit takutinneqarpoq, Folketingimi saamerliit 86-inik ilaasortaatitaqalissasut.
Nunatsinnit Savalimmiunillu saamerlernit ilaasortanngortussatut ilimagineqartut pingasut ilanngukkaanni, saamerliit 90-inik ilaasortaatitaqarlutik amerlanerussuteqalernissaminnut ilaasortamik ataasiinnarmik amigaateqassapput.
Savalimmiuni saamerlernit ilaasortaq qulakkeerneqareersimavoq. IA-p Siumullu Folketingimi inissanik marlunnik tigumminniinnarnissaat naatsorsuutigineqarpoq. Ukiunimi kingullerni aqqaneq-marlunni taamaattoqarsimavoq.
Isumasiuineq naapertorlugu ministeriuneq Mette Frederiksen amerlanerussutaarukkaluarpoq. Kisianni qiterliit ilanngunnagit ingerlaqqissinnaanissaminut qinikkamik ataasiinnarmik amigaateqarpoq.
Naalakkersuisunngortitsiniarnermi kissaatigisatut inissinneq
Naliliineq ilumoorsimassappat – Exit Pollilu siulleq taamaakkajuttarpoq – taava Atlantikup Avannaaneersut qitiusumik inissisimaffeqalersinnaapput. Tamanna pissanganarluinnarpoq. Naligiittoqartorujussuuvoq.
Talerperliit 73-inik ilaasortaatitaqalersussatut inissisimapput. Taamaalilutik Moderaterne ministeriunerusimasoq Lars Løkke Rasmussen siuttoralugu talerperlernut utertariaqassapput, naak talerperliit Statsministereqarfik qulakkiissapput qiterlerni naalakkersuisunngortitsinissaq qineqqusaarutigisimagaluarlugu.
Moderaterne 16-inik ilaasortaatitaqalersussatut inissisimapput Savalimmiuneersorlu talerperlerni qinigaasoq ilanngukkaanni ilaasortaatitat aalajangiisuusut 90-it pissarsiarineqassapput.
Lars Løkke Rasmussenili qineqqusaarneq tamakkerlugu ministeriuninngortussamik tikkuagaqarsimanngilaq.
Unnuk sivisussaqaaq.