Folketingimut qinersineq: Kalaallit Nunaat aalajangiisuusinnaavoq

Politikkikkut oqaaseqartartoq: Partiit talerperliit saamerliillu taaguunneqarnermikkut naligiinnissaat naatsorsuutigineqarpoq. Partiilli arlallit naalakkersuisuutitaqalernissamut isumaqatiginninniarsinnaapput. Tamanna naalakkersuisussanik aalajangiiniarnermi Kalaallit Nunaannut iluaqutaasinnaavoq.

Aki-Mathilda Høegh-Dam Aaja Chemnitzilu qineqqusaartussanngorput. Pitsaasumilli inissisimaffeqassasut politikkikkut oqaaseqartartoq isumaqarpoq.

IA i Folketinget

THOMAS MUNK VEIRUM

pingasunn 05. okt 2022 05:15

Annonse

- Qinersinerup qanoq inerneqarumaarnissaanik maannamut siulittuutigineqarsimasut takutippaat, partiit talerperliit saaamerliillu folketingimut qinersisoqarnerani amerlaqqatigiingajannik taaguunneqassasut. Kikkut naalakkersuisuutitaqalernissaannut partiit mikinerusut aalajangiisooratarsinnaapput, partiimmi mikinerusut ullumikkut amerlanerusut qinigassanngortissimammata.

Kalaallit Nunaanni folketingimut qinersineq

Kalaallit Nunaanni Folketingimut ilaasortassanik marlunnik qinersisoqartarpoq. Folketingimut ilaasortat ullormiit qinersivimmiit atuuttumik ukiunut sisamanut qinerneqartarput naalagaaffimmi qinikkatut - taamaattoq Savalimmiut ilanngunnagit.

Kalaallit Nunaat qinersiviuvoq ataaseq. .

Kalaallit Nunaanni Folketing-imut qinersisarneq Kalaallit Nunaanni Naalagaaffiup Sinniisuata aqutarisarpaa.

Naalagaaffiup Sinniisoqarfiata ulloq qinersivissaq tamanut ammasumik nalunaarutigisarpaa, tassunga ilanngullugu qinigassanngortitassat qaqugu kingusinnerpaamik nalunaarutigineqarnissaat nalunaarutigisarlugu.

Pissarsiffik: Sullissivik.gl

- Partiit mikinerusut naalakkersuisuutitaqalersinnaapput imaluunniit partiitut naalakkersuisunut tapersersortaalersinnaapput. Taamaalillutik Kalaallit Nunaanni Savalimmiuniillu folketingimi ilaasortaaitat marluk aalajangiisuusinnaallutik. Taamaalillutillu Kalaallit Nunaannut politikkikkut iluaqutaasussanik isumaqatiginninniarnissamut periarfissaqassallutik. Naalakkersuisooqatigiittussanik pilersitsiniarnermi tamarmik pissarsisartussaapput.

Taamatut oqarpoq aviisimi AG-mi aaqqissuisuuneq tusagassiorfimmilu Sermitsiaq.AG-mi pisortaaneq Christian Schultz-Lorentzen, taassuma tamanna pissutigalugu partiit qineqqusaarutiginiagaasa tusarnissaat qilanaaraassaq Aningaasaqarnermut Siunnersuisoqatigiit nalunaarusiaminni kingullermi saqqummiussimasaat eqqarsaatigalugu. Aammali sillimaniarnermut nunanullu allanut tunngasutigut politikkikkut sunniuteqarnerunissaq kissaatigineqarsinnaavoq.

Christian Schultz-Lorentzenip oqaatigaa, maanna folketingimi ilaasortaatitat marluk Aaja Chemnitz Larsen IA-meersoq aamma Aki-Mathilda Høegh-Dam Siumumeersoq taarserneqarnissaat takorlooruminaassinnaasoq.

- Folketingimut qinigaaffimmi matumani Folketingi atorluarlugu sunniuteqartarsimapput. Tusagassiorfiit nalinginnaasut inuillu attaveqaqatigiittarfii aqqutigalugit saqqummiussisarsimallutik. Tusagassiorfitsigut nalunaaruteqartarput. Inuiaqatigiinnit tatigineqarput, tamannalu iluaqutigisinnaavaat. Soorunami allamik saqqummertoqarsinnaavoq. Saqqummerniartorlu folketingimi ilaasortaatitanut marluusunut unammillissaguni erseqqissumik saqqummiussisariaqarluni.

inuiagatigiit nunatsinnit