Folketingimut qinersineq: Kalaallit Nunaat aalajangiisuusinnaavoq
Politikkikkut oqaaseqartartoq: Partiit talerperliit saamerliillu taaguunneqarnermikkut naligiinnissaat naatsorsuutigineqarpoq. Partiilli arlallit naalakkersuisuutitaqalernissamut isumaqatiginninniarsinnaapput. Tamanna naalakkersuisussanik aalajangiiniarnermi Kalaallit Nunaannut iluaqutaasinnaavoq.
- Qinersinerup qanoq inerneqarumaarnissaanik maannamut siulittuutigineqarsimasut takutippaat, partiit talerperliit saaamerliillu folketingimut qinersisoqarnerani amerlaqqatigiingajannik taaguunneqassasut. Kikkut naalakkersuisuutitaqalernissaannut partiit mikinerusut aalajangiisooratarsinnaapput, partiimmi mikinerusut ullumikkut amerlanerusut qinigassanngortissimammata.
- Partiit mikinerusut naalakkersuisuutitaqalersinnaapput imaluunniit partiitut naalakkersuisunut tapersersortaalersinnaapput. Taamaalillutik Kalaallit Nunaanni Savalimmiuniillu folketingimi ilaasortaaitat marluk aalajangiisuusinnaallutik. Taamaalillutillu Kalaallit Nunaannut politikkikkut iluaqutaasussanik isumaqatiginninniarnissamut periarfissaqassallutik. Naalakkersuisooqatigiittussanik pilersitsiniarnermi tamarmik pissarsisartussaapput.
Taamatut oqarpoq aviisimi AG-mi aaqqissuisuuneq tusagassiorfimmilu Sermitsiaq.AG-mi pisortaaneq Christian Schultz-Lorentzen, taassuma tamanna pissutigalugu partiit qineqqusaarutiginiagaasa tusarnissaat qilanaaraassaq Aningaasaqarnermut Siunnersuisoqatigiit nalunaarusiaminni kingullermi saqqummiussimasaat eqqarsaatigalugu. Aammali sillimaniarnermut nunanullu allanut tunngasutigut politikkikkut sunniuteqarnerunissaq kissaatigineqarsinnaavoq.
Christian Schultz-Lorentzenip oqaatigaa, maanna folketingimi ilaasortaatitat marluk Aaja Chemnitz Larsen IA-meersoq aamma Aki-Mathilda Høegh-Dam Siumumeersoq taarserneqarnissaat takorlooruminaassinnaasoq.
- Folketingimut qinigaaffimmi matumani Folketingi atorluarlugu sunniuteqartarsimapput. Tusagassiorfiit nalinginnaasut inuillu attaveqaqatigiittarfii aqqutigalugit saqqummiussisarsimallutik. Tusagassiorfitsigut nalunaaruteqartarput. Inuiaqatigiinnit tatigineqarput, tamannalu iluaqutigisinnaavaat. Soorunami allamik saqqummertoqarsinnaavoq. Saqqummerniartorlu folketingimi ilaasortaatitanut marluusunut unammillissaguni erseqqissumik saqqummiussisariaqarluni.