Folketingimut qinersineq: IA naalakkersuinissamut piareertoq

Inuit Ataqatigiit Kalaallit Nunaanneersumik issittoq pillugu naalakkersuisumik pilersitsisoqarnissaa piumasariniarpaa

Inuit isumaannik paasiniaasoqarnerani folketingimut qinersinermi allannguisoqangaatsianngippat Kalaallit Nunaanneersullu aalajangiisussanngorpata, isumaqatiginninniarnerni Issittoq pillugu ministereqalernissaa IA-p piumasariniarpaa.

- Folketingemut qinersereernermi
naalakkersuisunngortitsiniarnissami IA aalajangiisunngussappat piumasaqaatit qitiusut ilagissavaat
Issittoq pillugu Ministerimik toqqaasoqassasoq, taassumalu inuttassaa Nunatsinneersuusariaqarpoq.
Issittumi pissaaneqartutut Qallunaat Nunaat imminut taaguni tamanna aamma ima
isumaqartariaqarpoq Issittoq pillugu Ministereqartariaqartoq – taannalu Issittumi
aggerfeqartariaqartoq. Issittumi pisut annertuut ukiut makku pipput. Ilisimaarinnittullu tassaapput
Nunatsinneersut, partiip folketingimut qinigassanngortitaa Aqqalukkuluk Fontain tusagassiutinut nalunaarummi oqarpoq.

Namminiliivinnissamut alloriarneq

Taamatulli pisoqassangaluarpat Inuit Ataqatigiit naalakkersueqataanissamut piareersimapput.

- Aalajangiisussanngussangaluarutta folketingimullu qinersinermi Kalaallit Nunaanni partiit annersaatut inississagutta taava issittoq pillugu naalakkersuisup Inuit Ataqatigiinneersuunissaa tulluassaaq, folketingimi ilaasortaq qinigassanngortorlu Aaja Chemnitz Larsen, Sermitsiaq.AG-mut oqarpoq.

- Aalajangiisussanngorutta issittoq pillugu naalakkersuisup Kalaallit Nunaanneersuunissaa piumasaqaataassaaq.

Partiimi qinigassanngortittoq Anders Jensen isumaqarpoq, naalakkersuinermi kalaallit peqataatitaqarnissaat Kalaallit Nunaata namminiilivinnissaanut piareersaaqataasiinnaasoq.

- Ukkatarisassatut oqaatigisatta siunertaat arlaliupput, tassalu siunissatsinni Nunatta
namminiilivinnissaa, kiisalu nunarsuatsinnut avatitsinniittumut qanimut attaveqarnissaa.
Taamaammat pisariaqarpoq Qallunaat Nunaannut attaveqarnitsinni naligiinnermik pilersitsisumik
sunniuteqaqataanissarput, taanna tusagassiutinut nalunaarummi taama oqarpoq.

Lars Løkke Rasmussenip (V) ministeriunertut periarfisseqqinneqaqqissaguni kalaallimik ministerissamik toqqaasinnaanini AG-mit apeqqarissaarfigineqarnermini ilaatigut oqaatigaa. Atorfimmulli kina toqqassanerlugu oqaatiginngilaa.

Lars Løkke Rasmussenip apeqqarissaarfigineqarnera AG-mi atuaruk:

Powered by Labrador CMS