Skip to main content

Folketingimut qinersineq: Demokraatit qinigassanngortitatik saqqummiuppaat

Demokraatit, nunatsinni partiini arfineq-marluusuni kingullersaallutik, folketingimut qinersinissamut qineqqusaartitatimminnik saqqummiipput.

Naalagaaffeqatigiit iluanni nunat folketingimut juunip tallimaani qinersilerpata, Kalaallit Nunaanni innuttaasut qinersinnaasaannik pingasunik, Demokraatit sassartitaqarput.

Nivi Olsen, Steen Lynge aamma Jens Christian Jacobsen Demokraatit sinnerlugit folketingimut qineqqusaarput. Partiip siulittaasorigallagaata Randi Vestergaard Evaldsenip tusagassiortunik katersortitsinermi qineqqusaartut saqqummiuppai, taamatullu partiip folketingimi issiasuutitaqalissaguni suliniutissai saqqummiullugit.

- Savalimmiunut Danmarkimullu pitsaasumik suleqatigiissaagut, suliassaqarfiillu Danmarkimit tigummineqartut angerlaannissaannut suliaqassalluta, Randi Vestergaard Evaldsen tusagassiortunik katersortitsinermini oqarpoq.

Suleqatigiinneq qitiuvoq

Demokraatit folketingimut qineqqusaartuisa erseqqissarpaat nunatta folketingimi ilaasortaatitassaa tassaassasoq inuk nukittooq, ersarissunik oqariartuuteqartoq ersarissumillu politikkilik.

- Akisussaaffimmik tigusisariaqarpugut, inuk nukittooq ersarissumik nipilik ersarissumillu politikkilik folketingimi ilaasortaanissaa anguniartariaqarparput, Nivi Olsen oqarpoq.

Demokraatit arlalinnik suliniuteqassapput. Meeqqat nunatsinni atugaasa pitsanngorsaaviginissaat suliniutigerusuppaat, tamannalu naalagaaffiup iluani qanimut suleqatigiinnikkut anguneqassaaq Kalaallit Nunaata avataanit isigineqarnera pitsanngorsarneqassaaq, kalaallillu pillugit ilisimasat kultoorillu paasineqarnerunissaa anguniarneqassalluni, Jens-Christian Jacobsen isumaqarpoq. Suliniutinili tamani pingaarnertut inissisimavoq suleqatigiinnerunissaq.

- Taakku saniatigut silap pissusiata allanngoriartornerata annikillisinneqarnissaanut suleqatigiinnerunermik ujartuerusuppunga. Tamanna nunatsinni suliniutigisinnaavarput, kisianni eqqaamassavarput silap pissusiata allanngoriartornera nunarsuarmi tamarmi malugineqarpoq. Taamaammat silap pissusiata allanngoriartornerata annikillisinnissaanut tamatta suleqatigiittariaqarpugut, Steen Lynge oqarpoq.

Marloqiusamik qinigaaffeqarneq imaluunniit

Nivi Olsen aamma Steen Lynge Inatsisartuni ilaasortaapput.

Nivi Olsen aalajangereersimavoq folketingimi ilaasortanngussaguni Inatsisartuni sulinerminit ukioq ataaseq sulinngiffeqassalluni. Ukiorlu ataaseq sulinngiffeqareeruni nalilersussavaa Inatsisartuni Folketingimilu marloqiusamik qinigaaffeqassanerluni.

Steen Lyngemulli aalajangerniarneq ajornannginneruvoq.

- Marloqiusamik qinigaaffeqarnissaq akuersaartuunngilara. Taamaammat Kalaallit Nunaat sinnerlugu folketingimi ilaasortanngussaguma qinigaaffiup sinnera Inatsisartuni sulinngiffeqalissaanga. Qinikkatut marloqiusamik inissisimagaanni oqartussaaffiup aggulussimaneranik innarliinermik kinguneqartartoq isumaqarpunga, Sermitsiaq.AG-mut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER