Folketingimut qinersineq Danmarkimi taasinerit tamarmik kisinneqareerput

Folketingimut qinersinermi Danmarkimi taasinerit 100 procentii kisinneqareerput. Talerperliillu qinigaaffimmi nutaami naalakkersuisuutitaqalersussatut inissipput.

Ilaasortat 90-it

Partiit Lars Løkke Rasmussenip (Venstre) ministeriuninngorniarneranut tunuliaqutaasut 90-inik ilaasortaatitaqalersussatut inissipput, Helle Thorning-Schmidt (Socialdemokraterne) saamerliillu taamaallaat 85-inik ilaasortaatitaqalissasut. Taamaalillutik Atlantikup avannaanit qinigaasut sisamat kia ministeriuninngornissaanut sunniuteqarsinnaajunnaarput.

Talerperliit 52,4 procentinnapput saamerliillu 47,6 procentinnallutik.

Taasinerit 50,6 procentiisa kisinneqareerneranni talerperliit 91-inik aalajangiisuusunik ilaasortanngortitaqartussatut inissisimalerput, saamerliit 84-inik ilaasortaatitaqalissasut.

DF siuttunngortoq

Siuariarneq pingaartumik partiimit Kalaallit Nunaannik isorinnittumit Dansk Folkepartimit pivoq, taasinerit 21,1 procentiinik pissarsinermigut Venstre qaangerlugu talerperlerni partiini annerpaanngortoq.

Partii taamaalilluni Folketingimi 37-nik ilaasortaatitaqalissaaq, 2011-mi 22-nik ilaasortaatitaqalersimalluni.

Siuariarneq 72 procentiuvoq.

Angusaq partiip oqaluttuarisaanerani pitsaanerpaavoq, maannamut angusaasimasut pitsaanersaat 13,9 procentiusimalluni ilaasortallu 25-nik amerlassuseqalersimallutik, tassa 2007-imi qinersisoqarnerani.

Venstre talerperliit siuariaraluartut tamatuma akerlianik qinersisartunit inissinneqarpoq. Partii 7,2 procentiugallartumik kinguariarpoq 34-nillu ilaasortaatitaqalerluni.

V suli tapersersoraat

Siulittaasup Kristian Thulesen Dahlip nunamut tunngajuarnissani erseqqissaatigaa.

- Tamatumani politikkikkut annerpaamik sunniuteqalissagutta naalakkersuisooqataalernissamut ersissuteqannginnerput erseqqissaatigisimavara. Tassungali killinnissarput ilimagisariaqartutut inissinnaveersaaginnarsimavara, oqarpoq.

Kristian Thulesen Dahlip qinersineq sioqqullugu erseqqissaatigereerpaa, partiip Venstremeersoq Lars Løkke Rasmussen ministeriuninngortussatut tikkuaraa, tamannalu aatsaat taama pitsaatigisumik angusaqarnerup allanngortinnavianngilaa.

Venstre talerperliit amerlanerussuteqaleraluartut tamatuma akerlianik qinersisartunit inissinneqarpoq. Partii maannamut 7,2 procentinik kinguariarpoq 19,5 procentinut 34-nillu ilaasortaatitaqalerluni.

S siuariatsiartoq

Socialdemokratit taasinerit 26,3 procentiinik pissarsinermigut 1,5 procentinillu siuariarnermigut Folketingimi partiit annerpaartaattut inissisimalersussatut suli isikkoqarpoq.

Siuariarnerli tamanna partiit tapersersortigisat SF-ip aamma De Radikalet kinguariarnerannit nalimmassarneqarpoq, taakkua 4,2 procentinit aamma 4,6 procentinit taaguunneqarnermikkut ilaasortaatitamik affaannit amerlanernik annaasaqartussanngortunit.

Alternativet isertitaqartoq

Alternativet partiip siullermeerluni qinigassanngortinnerani 4,7 procentinit taaguunneqarluni arfineq-pingasunillu ilaasortaatitaqalernermigut angusarissaarpoq.

Enhedslisten 7,8 procentinit taaguunneqarluni 14-inillu ilaasortaatitaqalerluni saamerlernut siuariarnermik aamma pilersitsivoq.

Partii saamerlerneersoq taamaalilluni Folketingimi partiit annerpaartaasa sisamaattut inissisimalissaaq Liberal Alliancemit, 2,5 procentinik siuariarluni 7,5 procentinit taaguunneqartumit, annerulluni.

Konservativit isertitaqartut

De Konservative 3,4 procentinit taaguunneqarluni Folketingimi partiit minnerpaartariligassaattut suli isikkoqarpoq, Kristendemokraterne 0,8 procentinit taaguunneqarlutik 2,0 procentinit Folketingimut isissutaasinnaasunit ungasippallaartut.

Partiip siulittaasuata Stig Grenovip DR naapertorlugu ajorsarnertik nassuerutigaa.

/ritzau/

Aamma atuaruk: Atlantikup avannaanit qinigaasussat qitiusumik inissisimassasut

Qinersinerup inernera pillugu paasissutissanik nutaanik nutaterneqarpoq nal. 21:15