Folketingimjut qinersineq: KNR-p isumasiuisimanera isorineqangaatsiartoq

Isumasiuisimaneq KNR-p sisamanngornermi aallakaatitaa pitsaanngivippoq. Isumasiuinermi peqataasut tamatigoortumik akissuteqarnissaannut piumasaqaammik naammassinninngilaq.

Taamatut oqarpoq Najaaraq Demant-Poort Ilisimatusarfimmi adjunktiullunilu ph.d.-nngorniartuusoq.

- Nalaatsornerinnakkut akissuteqarsinnaasunik toqqaasoqarsimanngilaq akissutigineqartullu takutinneqartut ikippallaarlutik, taanna oqarpoq, itisiliillunilu:

- Periuserineqartumi ajornartorsiutaasoq siulleq tassaavoq, akissuteqarsinnaasut nalaatsornerinnakkut pissarsiarineqarsimannginnerat. Ajornartorsiutip aappaa tassaalluni, misissuinerup annikippallaarnera kisitsisillu nalorninarpallaarlutik. Ilisimatusarnermi atorneqarsinnaanerat akuerineqarsinnaani.

Aperaa.gl-imit nittartakkakkut allapput, suliffeqarfik digital aqqutigalugu sakkasuumik aalajangersimasumillu amerlassusilinnik isumasiuisartoq. Misissuinerit akissuteqartussaqartillugu kikkunilluunniit peqataaffigineqarsinnaasumik aaqqissuunneqartarput.

Qinersisartut isumaannut sunniuteqarsinnaasoq

Nalinginnaasumik isumasiuisoqartillugu akissuteqarsinnaasut nalaatsornerinnakkut pissarsiarineqartarput, innuttaasullu amerlanerit isumaat paasisaqarfiginiarlugu akissutigineqartut qanoq ukioqarneq, suiaassuseq nunallu suatuangaani najugaqarneq aallaavigalugit nalilersorneqassallutik.

Isumasiuinerit qinersisartorpassuit qinersisoqarnissaa sioqqullugu pissutsit maanna atuuttut pillugit isumaannik takutitsisinnaapput, taamalu taasinermut sunniuteqarsinnaallutik.

- Akissuteqarsinnaasunik nalaatsornerinnakkut pissarsinerunngilaq, inuit namminneq Aperaamut saaffiginnillutik misissuinermi akissuteqarsinnaasunut peqataatinneqarpata, Najaaraq Demant-Poort oqarpoq.

Allan Dalgaard, Aperaa.gl-imik ingerlatsisuusoq oqarpoq, misissuisimanini ajornartorsiutitaqanngitsoq.

- KNR-imit periusissaq kisitsisitigullu nalorninartoqarnera ilisimatitsissutigineqarsimavoq, taamaammat atuartartut tamanna namminneq nalilissavaat.

Akissuteqartussatut toqqarneqarsimasut eqqaaneqanngitsut

KNR-imit akissuteqartussatut toqqarneqarsimasut oqaatsimik ataatsimilluunniit eqqaaneqanngillat. Taamaallaat allassimavoq, nunatsinni innuttaasunit 578-iusut akissutigisimasaat tunngavigalugit naliliisoqarsimasoq.

Nassuiaatigineqartoq naammanngilaq.

- Periuseq atorneqarsimasoq malillugu innuttaasut amerlanerit qanoq isumaqarnersut qulakkeerlugu oqaatigineqarsinnaanngilaq, Naajaraq Demant-Poort erseqqissaavoq.

Taassuma erseqqissaassutigaa, akissutigineqarsimasut amerlassusaat partiit qanoq amerlatigisunik taaguunneqarsinnaanerannut atorneqarsimasut suli ikinnerusut:

- Akissuteqarsimasut 578-iusut 27 procentii kimik taasissanerlutik suli aalajangersimanngillat. Tassa akissuteqarsimasunit 421-t kisimik kisitsisini partiit qinigassanngortittullu ataasiakkaat taaguunneqarnerisa procentilersorneqarnerannut ilaapput.

Isumasiuinerit malillugit partiit ilaat qinersisartut 1,6 aamma 11 procentiinit taaguunneqassangatinneqarput, qineqqusaartulli ilaat partiiminnut taasisut amerlassusaat apeqqutaallutik qinersisartut 1 procentiinnaannit taaguunneqassangatinneqarlutik.

- Kisitsisit +-4,7 procentpointinik nalorninartoqartillugit, inernerit tatiginartutut saqqummiunneqartut 9,4 procentimik nikingassuteqarput. Taakku malillugit qinersineq qanoq inerneqarumaarnersoq nalilerneqarsinnaanngilaq, taanna oqarpoq.

Taamaammat atuartartumut eqqumaffigeqquaa, kisitsit pissarsiarineqartut nalorninartortaqangaatsiarnerat.

Isumasiuisimaneq arlaannut atorneqarsinnaava?

- Annertunerusumiunngitsoq, akivoq.

Kisitsisitigut paasissutissat upperisarsiornertut

Allan Dalsgaardip isumasiuisimanerup tutsuiginanngitsutut nalilerneqarnera isumaqatiginngilaa.

- Isumasiuinermi akissuteqartartunik atuisarneq periusaavoq akuerisaasoq, aaqqissuussisullu innuttaasut aalajangersimasumik amerlassusillit isumasiorneqarnissaat aalajangertarpaat. Kisitsisigut paasissutissat upperisarsiornertut. Apeqqutaavoq illit sumik upperinninnersutit aamma periutsit sorliit malillugit sulisarnersutit, taanna oqarpoq.

Najaaraq Demant-Poortip upperisap upperisarsiornermut assersuunneqarnera isumaqatigingilaa.

- Innuttaasut aalajangersimasumik amerlassusillit isumasiorneqarnissaannut tunngaviusumik ajornaatsunnguanik malittarisassaqarpoq kisitsinissamullu malittarisassaqarluni malinneqartussanik, innuttaasut aalajangersimasumik amerlassusillit apersorniarlugit taamugaannaq toqqarneqarsimasut oqaaseqartinnani. Innuttaasut qinersisinnaatitaasut akornanni taamugaannaq toqqaasoqartariaqarpoq aamma akissuteqartut suli amerlanerutillugit - inerniliunneqartut nalorninannginnerussapput.

Sernmitsisaq.AG-mit KNR-meersunik oqaaseqartitsiniartoqarpoq.