Folketingimi ilaasortaq: Kalaallit Nunaata nunat tamalaat suleqatigisinnaasariaqarpai
Puisit amiinik kina atisanik ilusilersuisinnaanersoq piffissami kingullermi oqallisigineqangaatsiarpoq. Jim Lyngvildip puisit amii atorlugit atisaliornera ilaatigut kulturitsinnik innarliisimasutut taagorneqaatigaa. Puisit amii pilerisaarutigineqarnerusariaqartut, kalaallit Folketingimi ilaasortaatitai isumaqarput.
Assiliisartoq atisanillu ilusilersuisartoq, Jim Lyngvild puisit amii atorlugit atisanik ilusilersugai assinngorlugit Ilulissani Eqqumiitsulianik katersugaasivimmi takutinneqartussaapput. Taakkulu piffissami kingullermi oqallisigineqangaatsiarput. Folketingimi ilaasortaq, Aaja Chemnitz Larsen isumaqarpoq oqallinneq sakkortuumik ingerlanneqartoq Kalaallit Nunaat nunanut allanut suleqatigiumaneqarsinnaaneranut sunniuteqarnerlussinnaasoq.
- Puisit amiinik tuniniaaniarutta taava nunarsuarmioqatitsinnut ammanerusariaqarpugut. Tamanna pingaaruteqartorujussuuvoq. Suliffeqarfik naammattunik aningaasanik isertitaqassappat nunatta iluinnaani puisit amiinik tuniniaaneq naammanngilaq, folketingimi ilaasortaq, Aaja Chemnitz Larsen (IA) oqarpoq.
Oqallinnerup aallartinnerani taanna ilaatigut TV2-p aallakaatitassiaani Go´Aften Live-mi peqataavoq. Oqallinnermi tassani ilaatigut oqaatigaa puisit amii annertuumik pilerisaarutigineqarnissaat pingaaruteqartorujussuusoq. EU-mimi puisit amiinik tuniniaaqqusinnginneq nunatsinnut eqquingaatsiarnikuummat. Taassuma saniatigut erseqqissaatigaa, Inuit puisit amiinik tuniniaasinnaanerat EU-miit annertunerusumik paasissutissiissutigineqarneq ajortoq.
Oqallinneq sakkortooq Kalaallit Nunaanut sunniuteqarsinnaavoq
Jim Lyngvildip assilisai pillugit oqallinneq sakkortooq atorneqarpoq. Tamannalu Kalaallit Nunaata tusaamaneqarneranut innarliisinnaasoq, Aaja Chemnitz Larsen isumaqarpoq.
- Piniarneq aallunneqartuassappat taava inuit avataaneersut tikilluaqqusariaqarpagut. Eqqaamassavarpullu Kalaallit Nunaanni inuussutissarsiorneq; aalisarnermut, takornariaqarnermut, puisit amiinut aatsitassarsiornermulluunniit tunngappat taava niuerneq nunat tamalaat akornanni pisussaavoq, Aaja oqarpoq nangillunilu:
- Oqallinneq peqqinnartuuvoq aamma piorsarsimassuseq eqqarsaatigalugu. TV-kkut oqallinneq isumakkeeqatigiiffiusinnaanngitsutut avissaartuuffiusutullu misigaara. Suleqatigisat pisisussalluunniit innarlernagit isumaqatigiinngissinnaaneq pingaaruteqartutut isigaara, Aaja Chemnitz Larsen oqarpoq.
Aki Matilda takutitsinermi peqataassaaq
Kalaallit Nunaata folketingimi ilaasortaatitaa Jim Lyngvildip saqqummersitassaata aappaani peqataalerpoq. Sermitsiaq.AG-p Siumut folketingimi ilaasortaatitaa apersorusussimagaluarpaa ullumikkulli iluatsinnagu. Aki-Matilda Høegh-Damillu sooq takutitsinermi peqataaniarnerluni Facebookimini ilaatigut ima tunngavilersuutigaa.
- Jim Lyngvildip suliaa tapersersorniarpara piniartunut - puisillu amia Europami saqqummiunniarmagu. Ukiorpassuarni puisit amiinik tunisiniarnerput ajornartorsiutaanikuuvoq EU-mi tuniseqqusinngineq pissutaalluni. Taamaammat puisit amiinik pilerisaarinerit tapersersorpakka, Jim Lyngvildillu takutitseqataarusunnginnersunga aperimmanga angerpara, Aki Matilda Høegh-Dam Facebookimini ilaatigut taama oqarpoq.