Folketingimi ilaasortaq Uummannamukarniartoq
Aki-Matilda Høegh-Dam (S) Uummannami innuttaasunik annertuumik tassaarsuaqarneqaranit eqqorneqarsinnaasunik naapitsiniarpoq. Politikkerip inuusuttup innuttaasut qanoq oqariartuutissaqarnersut tusarusuppai, aammali suliani pillugit oqaluttuarniarpoq.
Siumut sinnerlugu folketingimi ilaasortaq juunip qulinganiit 14-ianut Uummannamiinniarpoq. Pilersaarutigaa ulluni sisamani Uummannamiinnermini Uummannap kangerluani najugaqarfiit tamaasa tikeraarniarlugit.
Norgemi ilisimasallit GEUS-iminngaanneersullu nunamik kingullertigut misissuisimanerisa takutippaat, Karrat Kangerluanni qaqqamit annertuumik sisoortoqassappat maannamut takuneqarsimanngitsumik tassaarsuaqartoqassasoq. Najugarfinni Niaqornat Qaarsullu eqqugaanerpaasussaapput.
- Tassaarsuaqarsinnaanera pillugu tusagassiorfitsigut sammisaqarsimanerit pissutaapput, Aki-Mathilda Høegh-Damip Uummannami Uummannallu nunaqarfiini najugaqartunik naapitserusunneranut, politikkikkut siunnersorti Rosa Thorsen Sermitisaq.AG-mut oqarpoq.
Politkkeri inuusuttoq ulapissamaarpoq. Ullut sisamat ingerlaneranni nunaqarfiit tamaasa tikeraarniarpai, innuttaasunillu ataatsimeeqateqareeraangami Uummannamut utertarniarluni.
- Avannaanukarusuttuaannarsimavoq. Maannalu Uummannamukarnissaa Upernavimmukarnissaalu inissinneqareerluni, Rosa Thorsen oqarpoq.
Folketingimi ilaasortaq Uummannamut, Niaqornanut, Qaarsunut, Saattunut, Ukkusissanut Ikerasannullu tikeraarniarpoq.
- Uummannamut taassumalu nunaqarfiinut tikeraarnissara qilanaaraara. Innuttaasut ulluinnarni pitsaanerusumik inuuneqartoqarnissaanut qanoq oqariartuuteqarnersut tusassallugit uannut pingaaruteaqartuaannarpoq, Siumut sinnerlugu Folketingimi ilaasortaq Aki-Mathilda Høegh-Dam tusagassiorfinnut nalunaaruteqarnermi oqarpoq.