Folketingimi ilaasortaq ammaanersiorluni oqalugiarneq pillugu: Angusaavoq annertooq
Folketingimi ilaasortaq Aki-Mathilda Høegh-Dam (S) Mette Frederiksenip Danmarkip nunasiaateqarsimanera pillugu ammaanersiorluni oqaaseqarnermini ilanngummagu attortissimavoq. Politikkeri aamma Folketingimi qinigaaffeqaqqinnissamut piareersimanerarpoq.
- Attorteqaanga. Ministeriuneq nassuerutiginnilluni oqaaseqarpoq, tamatumalu neriuuteqartilerpaanga .
- Oqaasiisa neriuuteqartilerpaanga, qangami pisimasut ajortut nassuerutigineqanngippata, atassuteqaqatigiittarnermi pissutsit atuutseqqikkuminaallissapput, folketingimi ilaasortaq Aki-Mathilda Høegh-Dam, ministeriunerup Mette Frederiksenip Folketingimi ammaanersiorluni oqalugiaataanut qisuariarluni oqarpoq.
Ministeriunerup Mette Frederiksenip marlunngornermi ammaanersiorluni oqalugiarnermini Danmarkip Kalaallillu Nunaata qanga imminnut atassuteqaqatigiittarsimanerat toqqaannartumik oqaatigai:
- Danmarki nunasiaateqartuusimavoq. Nunasiaateqarnitsinnilu minnerunngitsumik Kalaallit Nunaannut itisuunik ikiliisimavugut, ministeriuneq ilaatigut oqarpoq.
Qanga pissutsinut isiginnittariaaseq allanngorsimasoq
Ministeriunerullu oqaasii Siumut sinnerlugu folketingimi ilaasortamit paasineqarsinnaapput, taannami isumaqarpoq pissutsit qinigaaffiup kingulliup ingerlanerani allanngorsimasut:
- Assersuutigisinnaavara Foplketingimi siullerpaamik oqaaseqarniarnera, taamanikkut Danmarki nunasiaatilittut oqaluttuassartaa oqaluuserisussanngorakku nalusimanngilara, inersuarmit sakkortuumik qisuariartoqassasoq.
- Oqaaserisakka nuannarineqarpallaanngillat, folketingillu inersuaanit Danmarkip nunasiaatilittut oqaluttuassartaa pillugu ammasumik oqaaseqarusuttoqarani, Aki-Mathilda Høegh-Dam oqarpoq, nangillunilu:
- Ministeriunerup nunasiaateqarsimaneq pillugu oqaaseqarluni Kalaallit Nuaannut ajortulortoqartarsimaneranik nassuerutiginninnera angusaavoq annertooq.
Suli naligiilertoqarsimanngitsoq
Taassuma oqaatigaa, nammineq iliuuseqartarsimalluni:
- Socialdemokraatit gruppiannik ministeriunermillu oqaloqateqartarnerpassuakka sunniuteqarsimapput, takorloorsimanngilaralu ministeriunerup qinigaaffiup naggataani ammaanersiorluni oqalugiarnermini tamakkut saqqummiutissagai.
Apeqqut: Ministeriunerup qinigaaffimmi matumani naligiinnerusumik suleqatigiittoqalersimaneranik naliliinera isumaqatigaajuk?
-Aap nikeriarsimaqaagut, aammali akuersaarneqarsinnaanngitsumik tunngavilimmik aallartippugut, sulilu aqqutissarput takeqaaq. Pitsaasunik alloriartoqarsimavoq, soorlu Kalaallit Nunaat Savalimmiullu nunanut allanut tunngasutigut peqataatinneqarnerulersimasut.
Qineqqusaarnissamut piarersimasoq
- Pisulli ilaanni Kalaallit Nunaannit peqataatinneqarnerusarnissaq kissaatigineqartarsimavoq. Oqaatigineqareersutulli aatsaat aallartilaarpugut.
Aki-Matilda Høegh-Dam Folketingimi suliaqaqqinnissamut piareersimanerluni nalunaarutigissallugu maannamut tunuarsimaarsimavoq. Qinersisoqarnissaa pingasunngornermi sisamanngornermiluunniit nalunaarutigineqassasoq naatsorsuutigineqarpoq, politikkerillu maanna oqaatigaa, qineqqusaarnissamut piareersimalluni:
- Qinersisoqarnissaa nalunaarutigineqarpat qineqqusaarnissamut piareersimavunga, patiilli uluani malittarisassaqarpoq ataqqineqartariaqartunik, Aki-Mathilda Høegh-Dam oqarpoq.
2019-imi 3.475-inik taaguunneqarluni folketingimut qinigaavoq.