Skip to main content

Folketingimi ataatsimiititaliaq Kinami angalanermi tatisimaneqartoq

Danskit suliffeqarfiutaat, kultoorilerinermik suliaqartui, oqartussaasui politikeriilu, Kinamit tatisimaneqarneruleriartorput. Folketingimi ullumi oqallinnermi tamanna paasinarsivoq.

Danmarkip Kinami tatineqarneruleriartornera Folketingemi ullumi oqallisigineqarpoq, Søren Espersenip (DF) Kinami angalasimanera oqaluuserineqarmat.

Søren Espersenip danskit naalakkersuisui nalunaaruteqaqquai Kinap danskit suliffeqarfiutaanut, kultoorilerinermik suliaqartunut, ilaatigut oqartussaasunut, naalakkersuisunut Folketingimullu tatineruleriartornera pillugu. Tamanna Tibetip nammineersinnaaneranik oqariartortunik nipagersaanermut attuumassuteqarnerarpaa.

Søren Espersen oqaluttuarpoq Folketingip nunanut allanut tunngasunut ataatsimiititaat Beijingimi angalanermini toqqaannartumik siorasaarneqarsimasoq.

- Kinami ornitatta paasisimavaat Tibetimi ministeri nunaminit anisitaq Borgenimut pulaassamaartoq, Folketingillu siulittaasuanik oqaloqateqarumasimasoq. Tamanna pillugu kinamiut ministeriannit naveerneqarpugut, ataatsimiitsitallu siulittaasuattut parteeqataasutullu uanga oqqersorneqarpunga siulittaasoq pulaarnissamut naaggaaqqussallugu. Peqataasugut tamatta tupaallappugut, oqarpoq.

- Folketingimi siulittaasoq maanna piffissaasuavoq, taamaammallu tibetimiu naapissinnaanngikkallarlugu, taanna sinnerlugu uanga allaffinni ataatsimeeqatiginnippunga. Ataatsimiinnerup aqaguani ataatsimiititaq kinamiut ambassadeannit oqarasuaatikkut sianerfigineqarpoq – ataatsimiissimaneq pillugu akerlerinnittoq kamappaloqaaq. Oqarasuaatikkut oqaloqatigiinnerinnaavoq. Taamaasilluni Kinap siorasaarisimaneranut malersuineranulluunniit takussutissaqanngilaq.

Holger K. Nielsenip (SF) pisumut uppernarsaavoq.

- Beijingimiinnitsinni sakkortuumik oqaluunneqarpugut. Siornatigut taama nalaataqarnikuunngilanga, tupaallaqqaqaangalu. Aallartitanut inussiarniitsumik oqaaseqarneq ersarissoq, killissamik qaagiineruvoq.

Akunnittarfiit neriniartarfiillu tatisimaneqarput

Taama pisoqarnera ineriartornerup ilagiinnaraa, Søren Espersen isumaqarpoq.

- Taiwanimi Tibetimilu aallartitanik, imaluunniit Falon Gongip inuinik unnuisitsisartut, kinap ambassadeqarfianit malersorneqartartut ullumi nalunngilarput. Helsingørimi neriniartarfik taama pineqarsimavoq. Kinamiit inuit sianerput ataatsimiinneq neriniartarfimmi pissappat, taava kinamiut neriniartarfik atoqqissanngikkaat ilisimatitsillutik.

Taanna isumaqarpoq, Danmark Kinamut sallaappallaartoq.

- Danmark Kinamut akuersaaginnarnera, Kinallu maannakkut Danmarkip naalakkersuisuinut, Folketingimut nioqquteqartuinullu pingaakujunniarnerunera pissutaavoq maanna Dansk Folkepartip apeqquteqaateqarluni oqaluuserisassaqartitsineranut.

Nunanut allanut tunngasunut ministerip Anders Samuelsenip (LA) Søren Espersen taperserpaa, Kinap nunarsuarmi inissisimanera annertusiartuinnartoq, tamannalu ajornartorsiutinik pilersitsisoq.

- Kinap pissaanera, aningaasaqarnikkut nukittussusaa anguniagaalu annertusiartuinnartut qularisassaanngillat. Nunarsuarmi naleqartitat iliuuserisallu Kinamit sunnerneqaleriartorput, nunarsuarmilu siunissami Kina sunniingaatsiartussaavoq. Kina maannakkut imminut tatigineruleriartortoq sunniuteqarnerunissamullu piumasaqarneruleriartortoq ullumikkut takusinnaalereerparput, oqarpoq.

Danskit naalakkersuisui: aalajangiusimavugut

Kinalli nukittuneruleriartornera nutaanik periarfissaqartoq, nunanut allanut ministerip takusinnaavaa.

- Danmark nunarsuarmi aningaasaateqarnerit tulliattut inuttunerpaatullu inissisimasumut suleqatiginninnissamik soqutigisaqarpoq – nuna nunarsuarmi sumiiffini aallaavigalugu sunneeqataarusussuseqartoq. Kinap aningaasaqarnikkut ineriartornerata Danmark nutaanik periarfissaqartilerpaa, ineriartornerli suliniutinut immikkorluinnaq pisariaqarpoq.

- Isiginiartariaqarparput Kinap inuiaqatigiittut ingerlanera uatsinnit allaanerummat, nunalli arlallit inuit pisinnaatitaaffii pillugit allatorluinnaq isumaqarpata, naleqartitagut unammillerneqarpata aalajangersimaannartariaqarpugut. Aalajangiusimavugut, Danmarkip nunap iluani aammali nunat tamalaat akornanni.

- Danskit naalakkersuisuisa isumaat ersarippoq: Danmarkimi tamat oqartussaanerat sumiiffimmiissinnaanerluunniit killilersorniarneqaraluarpat, uagut aalajangiusimavugut. Kinamit allatut kissaateqartoqarpat, tamanna akuerinngilluinnarparput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER