Skip to main content

Folketingimi aningaasanut inatsimmut isumaqatiginninniarnerit: Politiit aamma inissiisarfinni paarsisut akissarsiaat pitsaanerussapput

Nunatta folketingimut ilaasortaatitaasa aningaasaqarnermut ministeri Nicolai Wammen siullermeerlutik isumaqatiginninniarnissaq pillugu ataatsimeeqatigaat. Kalaallit tungaannit qitiusumik piumasaqaat tassaavoq, politiinut aamma inissiisarfinni paarsisunut akissarsiat pitsaanerusut.

Nunatta folketingimut ilaasortaatitaat marluk aningaasaqarnermut ministeri Nicolai Wammen (Soc) tamarmik immikkut isumaqatiginninniarnissaq pillugu piareersarnertalimmik siullermeerlutik ataatsimeeqatigaat.

Kalaallit Nunaanni politiit aamma inissiisarfinni paarsisut pitsaanerusumik akissarsiaqalernissaat tulleriiaarinissamut allattorsimaffimmi siullerpaatut inissisimavoq.

- Sumi najugaqarneq aallaavigalugu politiinut aamma inissiisarfinni paarsisunut akissarsiat assigiinngsinneqarneri atorunnaarsissavagut, Aki-Matilda Høegh-Dam (S), tusagassiuutinut nalunaarummi taama oqarpoq.

- Siullertut politiit inissiisarfinnilu paarsisut akissaataat qaffatsikkusuppagut, tassami sulianut assigiinnut akissaatit assigiittuunissaat isumagiuarsinnarparput, Aaja Chemnitz Larsen (IA), tusagassiuutinut nalunaarummi oqarpoq.

Politiit inissiisarfinnilu paarsisut pissarsiariniarnerannut tigummiinnarnissaannullu tunngasut pisariaqartut, Aaja Chemnitz Larsen isumaqarpoq.

- Sulisut taakkua pinerluuteqarnerit suliarinerini qitiusuupput kalaallinilu inuiaqatigiinni toqqissisimasitsisussaallutik. Maannakkorpiaq Kalaallit Nunaanni naalagaaffiup atorfeqartitai suleqatinit danskiusunit 4.500 kr.-inik akissaatikinnerunerat pissutigalugu inissiisarfik ataaseq sulisussaqannginnami matuinnartariaqalersimavoq, taanna oqarpoq.

Meeqqat illui

Meeqqat illuinik, meeqqanut kinguaassiutitigut kannguttaatsuliorfigineqarsimasunut katsorsaaqataaffiusussanik pilersitsinissamut, IA suli piumasaqartuuvoq. Meeqqat illui pillugit isumaqatiginninniarnissaq pillugu ataatsimiinnermi aamma oqaluuserineqarput.

- Aamma meeqqanut kinguaassiutitigut kanngutsaatsuliorfigineqarsimasunut ikiuisinnaaneq pillugu meeqqanut illuliortoqarnissaa tikkuarparput. Meeqqat systemimi eqqakattarneqassanngillat, saaffigisassaat ataasiinnaassaaq, tassaniissappullu oqartussaqarfiit tamarmiusut sinniisaat, Aaja Chemnitz Larsen tusagassiuutinut nalunaarummi taama allappoq.

Kalaallit Nunaanni Poltiit meeqqanut inuusuttunullu 2014-2018-ip akornanni Tasiilami kinguaassiutitigut kannguttaatsuliorfigineqarsimasut pillugit nalunaarusiamik saqqummersitsipput. Najukkami iliuuseqarnissamut tulluarsaanissaq anguniarlugu, nuna tamakkerlugu misissuisoqarnissaa pisariaqartoq, Aaja Chemnitz Larsenip ataatsimiinnermi naqissuserpaa.

Sukkanerusumik annaassiniartoqartarnissaa

Annaassiniartarnermi upalungaarsimaneq, SAR, Aki-Matilda Høegh-Damip kissaataani pingaaruteqarpoq. Imaani nunamilu ikiortariaqartut ukiumut amerlasarput. Ikiuisussallu piaarnerpaamik ajutoortunut orniguttarnissaat pisariaqarpoq.

- Sinerissap qanittuani inuaqatigiinnit, Issittup imartaani ulorianartumiittumi annaassiniarnermut upalungaarsimasunik Kalaallit Nunaat tamakkerlugu anngussinnaasunik peqassaagut, inuit inuunerannut tamanna tunngavoq, Aki-Matilda Høegh-Dam, taama oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER