Folketingi: Kalaallit napparsimmavimmi akeqanngitsumik suliaritissinnaanngorput

Folketingimi ilaasortat tamarmiullutik inatsisissatut siunnersuut akuerisimavaat, taanna aqqutigalugu inuit Kalaallit Nunaanneersuullutillu Savalimmiuneersut Danmarkimiikkallarnerminni napparsimmavimmi suliaritissinnaanngussapput.

Danskit Kalaallit Nunaanniikkallarlutillu Savalimmiuniikkallartut Kalaallit Nunaanni napparsimmavinni pinartoqartillugu suliarineqarsinnaallutillu suliarineqartuartussaapput. Kalaallinut Savalimmiormiunullu Danmarkimiikkallartunut periarfissaq tamanna atuutinngilaq. Maannamut.

Inuimmi Kalaallit Nunaanneersuullutillu Savalimmiuneersut Danmarkiikkallarnerminni napparsimmavimmi pinartoqartillugu suliaritissinnaanissaat suliartittuartarnissaallu qulakkeerniarlugu inatsisissatut siunnersuut Folketingimi akuerineqarsimavoq.

- Inuit Danmarkimi najugaqanngitsut napparsimmavimmi suliaritinnermut akiliuteqartarnissaat pillugu inatsit Folketingimi 2019-imi martsip qaammataani akuersissutigineqarmat, kalaallinut tamatuma kingunerisinnaasai eqqumaffigineqanngimmata uggorisimaqaara, pingaartumik inuit Danmarkimi najugallit Kalaallit Nunaanni napparsimmavinni akeqanngitsumik suliarineqarsinnaammata, Folketingimi ilaasortaq Siumumeersoq Aki-Mathilda Høegh-Dam taasisoqareersoq oqarpoq.

- Nuannaarutigaara, peqqissutsimut ministerimik Magnus Heunickemik oqaloqateqartarsimanera ajunngitsumik kinguneqarmat, aamma assigiimmik pineqartalissagatta, taanna itisiliilluni oqarpoq.

Folketingip nittartagaatigut erseqqissaassutigineqarpoq, napparsimasut naammassillugit suliaritissimanerannut aamma napparsimasut piartortut uninngavianniissimanerannut akiligassat najugaqarfigisimasamit naalagaaffimmiilluunniit kommunimut najugaqarfigisamut siunissami nassiunneqartalissasut. Kommuni najugaqarfigisaq tamatuma kingorna aningaasat utertinneqarnissaannut periarfissaqassaaq.

Powered by Labrador CMS