Skip to main content

Folketingi: Kalaallit Folketingimi ilaasortat tusagassiorfiit pillugit isumaqatiginninniarnissamut qaaqquneqartut

Aaja Chemnitz Larsenip tusagassiorfiit pillugit isumaqatiginninniarnermi, Danmarkimi tusagassiorfiit Kalaallit Nunaat pillugu saqqummiussaqarnerusarnissaat sulissutiginiarpaa.

Folketingimi atlanatikup avannaanit ilaasortaatitat Danmarkimi tusagassiorfinnut isumaqatigiissutissamik nutaamik isumaqatiginninniarnissamut siullermeersumik qaaqquneqarsimapput.

Tamatut ilisimatitsivoq Folketingimi ilaasortaq Aaja Chemnitz Larsen (IA), qaaqqusissut aqqutigalugu Danmarkimi Kalaallit Nunaat pillugu ilisimaqarnermik annertusaaniarsariniartoq:

- Tusagassiorfinnut isumaqatigiissutissaq uannut pingaaruteqarpoq, isumaqarama Kalaallit Nunaat pillugu Danmarkimi ilisimasaqarnerup annertunerulersinneqarnissaanut assigiinngisaartumillu takuneqartarnissaanut tamanna pingaaruteqarluinnartoq. Ullumikkut ataasiupajaaginnartumik isigineqartarnera ajoraluartumik arlalippassuarnit atorneqarpoq. Tamanna allanngueqataaffigerusuppara, Aaja Chemnitz Larsen tusagassiorfinnut nalunaaruteqarnermi oqarpoq.

Tusagassiorfinnummi isumaqatigiissut, assersuutigalugu DR-ip TV 2-llu aallakaatitassiassaannut piumasaqaatinik imaqartarpoq, tamanalu toqqaannartumik aqqutigalugu aallakaatitassiani Kalaallit Nunaat nutaaliaasoq pillugu paasissutissanik amerlanerusunik pissarsisoqarsinnaavoq.

Kalaallit Nunaat nutaaliaasoq pillugu takutitsisoqarpiarneq ajortoq

Danmarkimi nationalmuseumip oqaatsimik eskimomik atuinera pillugu siunersiueqatigiinnermut atatillugu, Aaja Chemnitz Larsenip (IA) kultureqarnermut ministeri Joy Mogensen (Soc) neriorsuitissimavaa, tusagassiorfinnut isumaqatigiissutissap isumaqatiginninniutigineqarnissaanut atlantikup avannaanit Folketingimi ilaasortat qaaqquneqarnissaannut.

Aaja Chemnitz Larsenimi isumaqarpoq, Danmarkimi tusagassiorfiit Kalaallit Nunaat nutaaliaasoq pillugu ilisimasakippallaartut:

- Tamanna allanngueqataaffigerusuppara, maannalu tusagassiorfinnut isumaqatigiissutissamut atatillugu kultureqarnermut ministeri Joy Mogensen iserfigisinnaanngorparput.

- Tamanna nuannaarutigaara, tamannami ileqquliutipallanneqarsinnaavoq. Kalaallit Nunaanni pikkorissorpassuarnik tunisassiortoqarpoq, filmiliortartoqarpoq, isiginnaartitsisartoqarpoq eqqumiitsuliortoqarlunilu, taakkulu assit filmillu aqqutigalugit nunarput pillugu nutaanik oqaluttuarsinnaapput, Aaja Chemnitz Larsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER