Folketingi: IA aamma Siumut suleqatigiinniarput

Kalaallit Folketingimut ilaasortaatitaat marluk Aki-Mathilda Høegh-Dam (S) aamma Aaja Chemnitz Larsen (IA) suli pisussaaffeqartumik suleqatigiinniarpasipput.

Taakku marluk akornanni aallarniutaasumik ataatsimiinnerat pitsaasumik ingerlavoq, Aaja Chemnitz Larsen (IA), Sermitsiaq.AG-mut taama oqaluttuarpoq.

- Politikkikkut isumaqatigiissuteqarnissarput siunnersuutigaara, tamannalu tunngavigalugu allaffissornikkut sulisut ataatsimoorutinngikkaluarpugut, IA-p folketingimut ilaasortaa, Kangerlussuarmi timmisartumut ikiartulersoq taama oqarpoq.

Taamaalillunilu ullormi qinersiffiusup unnukkuani neriorsuutertik piviusunngortilerpasippaat, tassani Folketingimi suleqatigiinnissartik neriorsuutigaat.

Aaja Chemnitz Larsen aamm Aki-Mathilda Høegh-Dam maanna Danmarkimukarput. Aqagu naalakkersuisunngornissamik isumaqatiginninniartuusoq aamma ministeriuninngorsinnaasoq Mette Frederiksen isumaqatiginninniarfiginissaanut aggersarneqarput.

Aallarniutaasumik ataatsimiinnermi sammisat qineqqusaarnermi aamma saqqiummiunneqartut arlallit oqaloqatigiissutigisimallugit, Aaja Chemnitz Larsen oqaluttuarpoq, soorlu meeqqat sunnertiasut, kisianni aamma politiit pinerluttunillu isumaginninnikkut suliaqartut akissarsiaannut tunngasut oqaloqatigiissutigaat.

- Tamatuma saniatigut ataatsimut danskit-kalaallit ilisimatusarnermut qitiuseqarfigisinnaasaannut periarfissaq oqaloqatigiissutigaarput, taanna oqarpoq.

Nunap soqutigisai qanoq pitsaanerpaamik suliarineqarsinnaanersut, Folketingimut ilaasortat marluk politikkikkut aamma apeqqutinut Kalaallit Nunaannut tunngassuteqartunut suliniutit sioqqullugit naapinnissamut pisussaaffiliinermik kinguneqarsinnaanera, Aaja Chemnitz Larsenip takorloorpaa.

Tamatuma saniatigut Siumut aamma Socialdemokraatit partiit akornanni suleqatigiinnissamut isumaqatigiissutit suliareqqilerpaat.