Folketingi: Aleqa qinersinermi aalajangiisuusinnaasoq

Folketingimut qinersisoqalerpoq. Kingusinnerpaamik aasakkut sulinngiffeqalinnginnermi. Partiit qinersinissamut piareersarput, paasissutissanilli tunniussivallaaratik - IA-meersoq Aaja Chemnitz Larsen kisiartaalluni qineqqusaarnissaminik nalunaaruteqareerpoq.

Partiit folketingimut qineqqusaartitassaminnik ujaasileruttorput. Qinersinermi kingullermi taajuunneqarnerpaaq Aleqa Hammond partiialu Nunatta Qitornai qinersinissami aalajangiisoorartarsinnaapput. Hammond Inatsisartunut qinersinermi kingullermi taajuunneqartorsuunngikkaluarpoq. Sinniisutut ullumi issiavoq. Folketingimulli qinersinermi kingullermi siuttuuvoq. Naak ilanngussat aningaasanut tunngasut pissutigalugit Naalakkersuisut siuttuattut tunuartariaqarsimagaluarluni.

Aviisi AG taama allappoq.

Qinersinissaq juunimi pissangatinneqarpoq, siusinneroratarsinnaallunili.

AG partiinut paasiniaalluni sianeqattaarpoq, IA-lli folketingimut ilaasortaatitaa Aaja Chemnitz Larsen maannamut kisimi qularnaappoq.

- Qinigassanngortikkumasunit soqutiginartunit arlalinnit saaffigineqarpugut, kinali alla qinigassanngorteqataatissanerlugu suli aalajanginngilagut, IA-mi siulittaasoq Múte B. Egede AG-mut oqarpoq.

Partiit allattaaq kikkunnik qinigassanngortitaqassanerlutik suli oqaluttuarumanngillat.

Partiit folketingimut piareersarnerat pillugu aviisimi AG-mi atuarnerusinnaavutit. Aviisi nittartakkakkut uani ataani pissarsiarisinnaavat:

Powered by Labrador CMS