Skip to main content

Folketingi: 80 millioner koruunit kinguaassiuutitigut innarliisarnerup akiorniarneqarneranut immikkoortinneqarput

Kinguaassiuutitigut innarlerneqarsimasut ikiorniarlugit Danmarkimit 80 millioner koruuninik aningaasaliissuteqartoqassasoq aalajangiunneqarsimavoq. Aaja Chemnitz Larsenip oqaatigaa Naalakkersuisut sulillutik aallartissinnaanngortut

Meeqqat kinguaassiuutitigut innarlerneqartarnerat akiorniarlugu aamma meeqqat atugarliortut ikiorsiiffiginiarlugit Danmarkip immikkutittumik ikiorsiissuteqarnissaa isumaqatigiissutigineqarpoq.

Aningaasat folketingimi isumaginninnermut tunngasutigut isumaqatiginninniarnerup ilaatut immikkoortinneqarsimapput. Danmarkimi isumaginninnermut ministeri Astrid Krag (Soc) oktobarip qaammataata aallartinneranili nalunaaruteqarpoq, kalaallit meerartaasa immikkut ittumik ikiorneqarnissaannut 80 millioner koruuninik ukiuni sisamani atorneqartussanik nassaarniarsariniarluni.

- Danmarkimi naalakkersuisut anguniakkamik attassiinnarsimanerat aamma aningaasassarsisimanerat pillugu annertuumik nersualaarusuppakka, Aaja Chemnitz Larsen (IA) oqarpoq.

Naalakkersuisut meeqqat kinguaassiuutitigut innarlerneqartarnerat imminortarnerallu akiorniarlugu immikkut ittumik ikiorneqarnissamik piumasaqaqqullugit upernaaq arlalinnit piumaffigineqarsimapput. Tamanna pivoq DR-kkut piviusulersaarut, 'Byen hvor børn forsvinder', aallakaatinneqareersoq.

Nunatsinni aningaasanut inatsimmi immikkut aningaasaliissuteqartoqanngitsoq

Aaja Chemnitz Larsenip (IA) folketingimut qinersinissaq sioqqullugu  katillugit 100 millioer koruuninik nalilimmik immikkut ittumik ikiorsiisoqarnissaa siunnersuutigisimavaa, Danmark 80 millioner koruuninik Kalaallillu Nunaat 20 millioner koruuninik akiliuteqartussanngorlugit.

- Soorlu siusinnerusukkut oqaatigisareeringa, Danmarkimit ikiorserneqarnissaq periarfissatsialaavoq, ajornartorsiutit taakku ilungersunarluinnartut tunngaviisigut iliuuseqarfiginissaannut, Aaja oqarpoq.

- Naalakkersuisut maanna iliuuseqartariaqarput, meeqqammi atugarliortut ikiorneqarnissaat Kalaallit Nunaata akisussaaffigaa.

Naalakkersuisut Demokraatillu aningaasanut inatsisissaq pillugu isumaqatigiissutaanni, ippassaq saqqummiunneqartumi, suliassaqarfimmut immikkut aningaasaliissuteqartoqarsimanngitsoq takuneqarsinnaavoq.

- Danmarkimit ikiorserneqarneq Naalakkersuisunut kommuninillu sinnassaataassanngilaq. Ataavartumik sivisuumillu ikiorsiisarnissamut aallarniutaassaaq, uagut nammineq isumagisassavut isumagissavavut, Aaja Chemnitz Larsen (IA) oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER