isornartorsiorneq
FN-ip piumasaa: Meeqqat iliuuseqarfigineqarnerat nukittorsarneqassaaq
FN-ip meeqqat pillugit ataatsimiititaliaata Nunatsinni meeqqat atornerlunneqartartut amerlanerat ernumanartippaa. Iliuuseqarnerup qanoq nukittorsarnissaanut ataatsimiititaliaq arlalinnik innersuussuteqarpoq
Qaammat kingulleq Naalagaaffeqatigiit Nunarput ilanngulluni FN-ip meeqqat pillugit ataatsimiititaliaani misilitsipput. Tassanilu misilitsinnermi Nunatsinni meeqqat pisinnaatitaaffiinut tunngatillugu sakkortuumik mianersoqqussuteqartoqarpoq: Pitsaanngilluinnarpoq, tamanna nalunaarutigineqarpoq.
Meeqqat atornerlunneqartarnerisa aamma sumiginnagaasarnerisa annertussusaat ataatsimiitiliat ernumassutigaat.
Aamma atuaruk: Nunarput meeqqat pisinnaatitaaffii pillugit misilitsippoq
Namminersorlutik Oqartussat meeqqanik atornerluisarnerit akiorniarlugit annertuumik suliniutigisaminik nukittorsaasariaqartoq, taanna kaammattuivoq. Tamanna ilaatigut kommunit atornerluinernik takunnissinnaanissamut nukittorsarneqarnerisigut pissaaq.
Meeqqat illersuisuata Naalagaaffiit Peqatigiit innersuussutaat ersarissut tikilluaqquai.
- Naak meeqqat ikiorserneqarnissartik pisinnaatitaaffigigaluaraat, taamaattoq meeqqat atornerlunneqartartut tupinnaannartumik pisortanit ikiorserneqarneq ajortut ilisimavarput. Aammali nalunngilarput meeqqanik ikiuinissamut tunngagaangat kommuneni sulisutigut iliuuseqarsinnaassutsikkullu iliuuserineqarsinnaasut killeqartaqisut, Aviâja Egede Lynge tusagassiuutinut nalunaarummi allappoq.
- Nalaagaaffiit Peqatigiinniit ajornartorsiut tamanna eqqumaffigineqarpoq innersuussutigaallu kommuneni sulisoqarnikkut nukittorsaasoqartariaqartoq, meeqqammi atornerlunneqarnerat siusinnerusukkut paasineqartarniassammat aammalu meeqqat pisariaqartitaat aallavigalugit ikiorneqarnissaat illersorneqarnissaallu qulakkeerneqarniassammat.
Meeqqat imminut toqunnissamik eqqarsaateqartut pillugit suliaqartut qisuariarnissamut pikkorinnerulernissaat, meeqqat angerlarsimaffiup avataanut inissinneqarsimasut tusaaneqassasut aamma meeqqat inuusuttullu atornerluisuusut katsorsarneqarnissamik neqeroorfigineqassasut, meeqqat pillugit ataatsimiititaliap innersuussutaasa ilagaat.