Meeqqat pisinnaatitaaffii
FN-ip Meeqqanut isumaqatigiissutaa nalliussineqassaaq
Demokraatit Naalakkersuisut kajumissaarpaat FN-ip Meeqqanut isumaqatigiissutaata ukiunik 25-inngortorsiornera nalliusseqqullugu
Demokraatit iluarisimaartorujussuuvaat nunami maani politikkikkut atituumik isumaqatigiissutigineqarmat meeqqat pisinnaatitaaffii inuunerissuunissamillu pisinnaatitaaffiat sorsuutigineqassasut. 2014-imi novembarip 20-anni ukiut 25-erpiaat qaangiutissapput Meeqqanut isumaqatigiissut FN-ip ataatsimeersuarnerani tamanit isumaqatigineqarluni akuersissutigineqarmat.
– Neriuppugut Naalakkersuisut ulloq taanna nalliussiumaaraat, Demokraatit siulittaasuat Anda Uldum paragraf 37 naapertorlugu apeqqummini allappoq, tassani apeqqutigigamiuk ullormut tassunga Naalakkersuisut pilersaaruteqarnersut.
Apeqqumminut tunngavilersuutigaa Meeqqanut isumaqatigiissut nunani tamalaani inuit pisinnaatitaaffiinik isumaqatigiissutaammat siulleq, tassuuna meeqqat inatsisitigut immikkut inissisimatinneqalerlutiik. Taanna FN-ip 1989-imi novembarip 20-anni ataatsimeersuarnerani akuersissutigineqarpoq.
Isumaqatigiissummi aalajangersarneqarpoq inuit tamarmik 18 inorlugit ukiullit Meeqqanut isumaqatigiissummi pineqartut. Erseqqissarneqarpoq meeqqanut iliuutsini tamani meeqqap pitsaanerpaamik pineqarnissaa eqqarsaatigineqartassasoq.
Meeqqanut isumaqatigiissutikkut qulakkeerneqarpoq nunarsuarmioqatigiit akuersaaraat meeqqat illersorneqartariaqartut, inuttullu pisinnaatitaaffeqartut. FN-ip Meeqqanut komite-ata akuttunngitsumik misissortarpaa nunani ilaasortani ataasiakkaani meeqqat qanoq atugaqarnersut, takussutissiortarlutik inassuteqaateqartarlutillu, Anda Uldum apeqqumminut tunngavilersuummini allappoq.