FN-ip aallartitaa: Kalaallit Nunaanni inuiaqatigiit unammilligassaqarput
FN-ip immikkut ittumik nalunaarusiortittagaa ilaatigut inunnut innarluutilinnut pissutsinik isornartorsiuivoq, kiisalu meeqqanik kinguaassiuutitigut atornerluisarnerit imminullu toquttarnerit amerlavallaarnerannik ernummatiginnilluni.
FN-imi nunat inoqqaavisa pisinnaatitaaffii pillugit immikkut nalunaarusiortartoq, Cali Tzay, Danmarkimut nunatsinnullu tikeraaqqammerpoq, sapaatip-akunneranilu kingullermi tallimanngornermi inerniliissutigigallakkani Danmarkimi tusagassiortunik katersortitsinermi saqqummiullugit.
Nalunaarusiortartoq Danmarkimik isornartorsiuivoq, aammali nunatsinni pissutsinik arlalissuarnik ernummatiginninnerarluni:
- Kalaallit Nunaanni inuiaqatigiit suli arlalissuarnik unammilligassaqarput piitsuussutsimut aamma inissianik naleqquttunik amigaateqarnermut, ilinniakkanik naleqquttumik pitsaassusilinnik amigaateqarnermut kiisalu tarnikkut peqqissutsimut ikorfartuinermut annikitsumut attuumassuteqartunik, Cali Tzay oqarpoq.
- Kalaallit Nunaanni meeqqat 20 procentiisa missingisa nakuuserfigineqartarnerat kinguaassiuutitigullu atornerlugaasarnerat ilimagineqarpoq, oqarpoq, ilassuteqarlunilu, Kalaallit Nunaanni imminut toquttartut nunarsuarmi amerlanerpaat akornanniittut.
Inunnut innarluutilinnut pissutsit isornartorsiorneqartut
Cali Tzayip saqqummiussinermini inunnut innarluutilinnut pissutsinnik aamma isornartorsiuivoq. Pingaartumik ilinniagaqarsinnaaneq pimmatiginninnermullu illersorneqarneq ernummatigai:
- Iliuusissatut pilersaarusiaq angisuujusimagaluartoq suli angisuunik unammilligassaqarpoq, inuit innarluutillit ilinniagaqarsinnaanermut pimmatiginninnermullu illersorneqaatissanik inatsiseqannginnera pissutigalugu pisinnaatitaaffimminnik qulakkeerunneqarsinnaanerat eqqarsaatigalugu.
- Inuit innarluutillit allanik periarfissaqannginnera pissutigalugu utoqqaat angerlarsimaffiinut inissinneqartarnerat tusarsimavara, Cali Tzay ilaatigut oqarpoq.
Tamatuma saniatigut ajornartorsiutit isiginiarneqarnissaannut inuit innarluutillit illersuisuata atuuffia erseqqissaatigaa.
Takornariaqarnermut akuersissutit pillugit ernummatiginninnerit
Immikkut ittumik nalunaarusiortartoq tamatuma saniatigut takornariaqarnermi, aatsitassarsiornermi attaveqaasersuutinilu suliniutinik aallartitsisoqassatillugu inuit naammattumik oqaasissaqartitaanerannik ernummatiginninnerminik aamma erseqqissaateqarpoq:
- Kalaallit Nunaanni naalakkersuisut ilungersorlunga kaammattorpakka inuiaat inuit siunersiueqatigisaqqullugit, taakkuami inuuniarnikkut tunngavigisaat aatsitassarsiornerup, takornariaqarnerup attaveqaasersuutillu annertusarneqarnissaannik pilersaarutinit toqqaannartumik sunnerneqartussaammata, Cali Tzay oqarpoq.
Aamma nersualaarisoqarpoq, Cali Tzayip Namminersorlutik Oqartussat tassaanerarmagit ’nunat inoqqaavisa namminersorneranni suliaqarnikkut aamma nunarsuarmi nunat inoqqaavinut nammineq aalajangiisinnaaleriartornermi eqqissisimanartumik suliaqarnikkut assersuutissaqqissut isumassarsiorfissaqqissut.'