FN-imit nalunaarusiaq: Uani ajortumik ingerlasoqarpoq

Eqqakkat inunnit pilersitat amerlanerusut, silaannaap kissatsikkiartornera aamma uumassusillit assigiinngisitaarnerannik annaasaqarneq. Nunarsuaq artukkeqqinngikkaluarlugu inuit atugaat suli pitsanngortinnissaat nassaarisinnaanngikkipput, FN-ip nalunaarusiaata tikkuarpaa.

Silap pissusiata allanngoriartornerata aamma piujuartussamik ineriartortitsinerup pingaassusaata ilisimaarineqarnera aatsaat taama ullumikkut annertutigaaq.

Taamaakkaluartoq atajuarsinnaasumik ineriartorneq arriingaarmat, 2030-imut FN-imi nunat nunarsuup annaannissaanut anguniakkatik angusinnaanavianngilaat. Immikkoortuni sisamani killormut ingerlasoqarpoq:

  • Nunarsuarmi naligiinnginneq annertusiartorpoq
  • Silaannaq kissatsikkiartorpoq
  • Uumassusillit assiigiinngissitaarnerat navianartorsiorpoq
  • Eqqakkat inunnit pilersinneqartut amerliartorput

Politikenip allaaserisaaa naapertorlugu ilisimatuut 15-it arlaannaanulluunniit attuumassuteqanngitsut nalunaarusiami tamanna oqariartuutigaat, taanna maanna nunanut FN-imi ilaasortanut nassiunneqarpoq, taakku ilisimatuut innersuussutaannut oqaaseqaateqarlutillu qisuariaateqassapput.

Nunarsuarmi anguniakkat 17-it

Ilisimatuut FN-mit toqqagaapput, ukiut sisamakkaarlugit Global Sustainable Development Reportimik allattussaatinneqarlutik, tassa nunarsuarmi piujuartussamik ineriartortitsinermut anguniakkat 17-it, naalagaaffiit aamma naalakkersuisut siuttuisa 2015-imi tamarmik isumaqatigiillutik akuersissutigisaasa anguniarneqarneri qanoq ingerlanersut nalunaarusiarineqartassallutik. Taamaalilliuni FN-ip anguniagaasa annersaasa ilaannik naatsorsuusiorneq siulliuvoq.

Nalunaarusiaq suli saqqummiunneqanngilaq, kisianni Politikenip assilinera pissarsiarisimavaa. Taanna ilisimatuussutsikkut allaatigisanik aamma paasissutissanik pioreersunik tusarfinnit aallaaveqarpoq, aamma FN-imi aaqqissuussaanermit.

Powered by Labrador CMS