Flemming Andreassen ajunngitsoq nassaarineqarpoq
Politiit, Arktisk Kommando innuttaasullu ulluni marlunni ujaarinnereersullu 18-inik ukiulik Flemming Andressen nassaarineqarpoq.
OBS. Arktisk Kommandop paasissutissaataanik allaaserisaq ilaneqarpoq nal. 17.45.
Flemming Andreassenip ikinngutai ilaqutaalu pingasunngornermi ualikkut annakkuummernerup pianik anersaarulorujussuarput. Flemming Andreassen ajunngitsoq nassaarineqarpoq. Ilaqutaasut Sermitsiaq.AG-mut taama ilisimatitsipput.
Aasiaat kujatinnguani Appani umiatsiaararsortumit nassaarineqarsimavoq, maannalu Kangaatsiami angerlarsimalereerluni, Najannguaq Teckemeier Sermitsiaq.AG-mut oqaluttuarpoq.
- Ujaaseqataallutik ikiuuttunut tamanut qujarujussuarpugut. Ilaqutariiusunut uagutsinnut isumaqartorujussuuvoq ujaaseqataasut taama amerlatigimmata, neriunnermillu annertuumik tunisipput.
Flemming Andreassen Kangaatsiamiit Aasiaat tungaannut ataasinngornermi ullaassakkut sisamat missaanni aallarnermi kingorna tammaaneqalerpoq.
Arktisk Kommando, politiit kajumissutsiminnillu ujaaseqataasut sumiiffik annertooq ulluni marlunni kingullerni ujaasiffigisimavaat.
Atortorissaarnissaq pingaaruteqarpoq
Arktisk Kommando pingasunngornermi ualikkut ilisimatitsivoq Kalaallit Nunaata Politiivi, Air Greenland, Illersornissaqarfiup timmisartortui, Illersornissaqarfiup imarsiortui kiisalu Aasianni Kangaatsiamilu innuttaasut ujaasinermi peqataasimasut. Arktisk Kommandop ikiuuttut qutsavigai.
Arktisk Kommandop eqqaasitsissutigaa imarsiornermi atortorissaarutit pisariaqartut nassarneqarnissaat pingaaruteqartoq, ajutoornermi nassaarineqarnissaq ilimanarneroqqullugu.
Ujaarineqartut attaveqaatinut sillimaniarnermullu atortunik nassataqartinnagit oqartussat ujaasiniarnerat ajornarnerusarpoq. Arktisk Kommandop misilittagai malillugit atortorissaaruteqarluartillugit ujaarineqartut naniuminarnerusartut.
- Taamaammat kaammattuutigissavarput GPS, VHF-radiot nassiussissutillu InReach-it angalanermi nassarneqartaqqullugit, ajutoornermi sumiiffik kalerriutigineqarsinnaaniassammat, Arktisk Kommandomit Camilla Schouw Broholm ilisimatitsivoq.
Taassuma ilanngullugu oqaatigaa annanniutit sakkortuunik qalipaatillit atorneqartillugit silaannakkut ujaasisoqarnerani nanineqarnissaq ilimanaateqarnerusartoq.