Skip to main content

Finn Lyngemut nersuineq

- Nunatta oqaluttuarisaanerani inuk malunnaatilik Finn Lynge akornatsinniikkunnaarpoq, Inatsisartut siulittaasuat Lars-Emil Johansen allappoq

Finn Lynge Qaqortumi angerlarsimaffimmini tallimanngormat ullaakkut sivisuumik napparsimareerluni 80-inik ukioqarluni toquvoq. 

Inatsisartut siulittaasuata Lars-Emil Johansenip Finn Lyngemut nersorinnippoq, allatani qulequtserlugu 'Nunatta oqaluttuarisaanerani inuk malunnaatilik Finn Lynge akornatsinniikkunnaarpoq': 

'Ajuusaarutigeqisatsinnik tusarparput inuiaqatigiinni oqallinnermut akuulluartartoq, naalakkersuinermik sulialik palasilu, kisiannili minnerunngitsumik inuk, Finn Lynge toqukkut qimaguttoq. Finn nunatta oqaluttuarisaanerani nutaajunerusumi inuit saqqummilaarnerit ilagisimavaat, annertuumillu aamma nammineq sunniuteqarsimasoq immitsinnik nunatsinnillu isiginnittaaseqarnitsinnik.

Assigiinngitsorpassuarnik ingerlataqarsimanerminut Finn nunarsuarmioqataalluartutut ilisimaneqarlunilu ataqqineqarpoq. Finnip ingerlatani tamaasa tunniusimaqaluni ingerlattarpai, kisiannili aamma sutigut tamatigut uummatini, minnerunngitsumillu anersaani, qimanngisaannarlugit, tamatigut inuiaqatigiinni sanngiinnerusut tapersersortarlugit nuimanerusullu isoriniarsinnaasarlugit.

Finnip inuunermini ukiuinit kingullerniit ilaatigut eqqaamaneqassaaq Tulukkamik taaguuserlugu paasisitsiniaanermut atatillugu saqqummilaartumik peqataanera, tamatumani ilaatigut tunniussarimmagit piniarnermik kultureqarnerput pillugu KNR-imi oqalugiaatit qulit kingusinnerusukkut atuaganngorlugit saqqummersinneqartut "Nalitsinni piniarneq pissuserissaarnerlu”. Tamanna ukiorpassuarni pingaarteqalugu ingerlappaa. Nammineq Finn 1993-imi sølviusumik Nersornaaserneqarnissaa inassutigigakku taamanikkut oqaatigaara Finn Lynge kalaallinit allanit annertunerungaartumik pissutsinik nunatsinni piniartunut atugassarititaasunik piujuaannartitsinermillu tunngavilimmik pinngortitami uumasunik iluaquteqarniarsinnaanerannik avatitsinni inuiaqatigiissuit paasinnilersissallugit iluatsissimagaa. Finnip nersornaaserneqarnini tigulluarpaa, kisianni aamma inuttaanut ilisarnaataasumik namminerlu kissaatigisaanik tamanna pivoq annertunerusumik persuarsiornertaqanngitsumik. 

Piffissami tamatumani aamma eqqaamaneqassaaq oqaatigineqartariaqarlunilu 1999-imiit 2003-mut namminersorneq pillugu isumalioqatigiissitani siullerni tunniussimalluni annertuumik suleqataasimanera. Isumalioqatigiissitap taassuma sulinerani kingusinnerusukkut nunatta Danmarkillu akornanni namminersorneq pillugu isumalioqatigiissitap pilersinneqarneranut, sulineratalu ullumikkut namminersulernermik inerneqarsimasumut, tunngaviuvoq.  

Taamatuttaaq puiorneqassanngillat atuakkiarpassui allaaserisarpassuilu allat. Minnerunngitsumik nunatta Danmarkillu akornanni pissutsit pillugit atuakkiaa ”Tango nalunartoq” eqqaamasalikkersaarutaalu qanittukkut saqqummersut kingulissatsinni ataavarlutillu eqqaamaneqartussaapput. 

Finn qujassutissaqarfigeqaarput nunatta avatitsinniit assigiinngisitaarnerusumik isigineqalernissaanik suliniarsimaneranut, ataqqinartutullu eqqaamajuassavara. Inatsisartut sinnerlugit qimagaasunut, uillarneranut Rie Oldenburgimut meeraannullu kiisalu Finnip paniinut inersimasunut allanut marlunnut qamannga pisumik misiginneqataanerput ingerlateqqippara.

Eqqaaneqarnera ataqqinartuuli', Inatsisartut siulittaasuat Lars-Emil Johansen allappoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER