Toqusoq
Finn Lynge toquvoq
Siornatigut Europa-Parlamentimi ilaasortaq atuakkiortorlu Finn Lynge tallimanngornermi ullaakkut toquvoq
Finn Lynge 80-nik ukioqarluni tallimanngornermi ullaakkut Qaqortumi angerlarsimaffimmini toquvoq sivisuumik napparsimareerluni. Siornatigut politikkeri, atuakkiortoq oqallissaarisartorlu assigiinngitsorpassuartigut suliaqartartoq namminersorneq pillugu isumalioqatigiinni aamma ilaasortaasimavoq.
Finn Lynge qaammatit kingulliit napparsimavoq annertuumillu pilatsinnissani nammineq kissaatigisimanngilaa nakorsat qularutigimmassuk anigorsinnaaneraa.
- Rigshospitalimi toqorusussimanngilaq inuunini Kalaallit Nunaanniilluni naarusukkamiuk. Aamma ilisaanissani pilersaarusioqqissaareernikuuaa, uillarnera Rie Oldenburg Sermitsiaq.AG-mut oqarpoq.
Finn Lynge sapaatip akunnera tulleq Qaqortumi ilisaassaaq ilaqutaasut katersuussimaleriarpata. Nulii paninilu najortigalugit tallimanngornermi ullaakkut anerningerpoq. Nammineq kissaateqarnera malillugu aamma Qassiarsummi Thorhildep oqaluffiata eqqaani eqqaaniaasoqassaaq.
Atuaruk: Finn Lynge ataqqinaammik doktorinngortinneqarpoq
Aaqqissuisup ernera
Finn Lynge 1933-mi Nuummi inunngorpoq ataatagalugu Atuagalliutini aaqqissuisoq Kristoffer Lynge. Finn Lyngep angummi tumai atuallappai angunni assigalugu radiomi 1974-mi pisortanngorami. Aammattaaq politikkikkut oqallinnermut akuuvoq taamalu namminersornerulernissaq pillugu isumalioqatigiissitap radio pillugu ataatsimiititaliaani ilaasortaalluni kingornalu Nunatta EF-mi ilaasortaanerani 1979-miit 1984 tikillugu Europa-Parlamentimi ilaasortaalluni.
Finn Lynge aamma katuullit palasiattut sulisimavoq filosofi upperisarsiornerlu pillugit Frankrigimi, Romimi USA-milu ilinniagaqarnermi kingorna. Randersimi palasimut ikiortaasimavoq aammalu Nuummi palasiusimalluni.
Aammattaaq arlalissuarnik atuakkiorsimavoq kalaallisut, qallunaatut tuluttullu saqqummersinneqartunik aammalu namminersornerullutik oqartussat saqqarmiuliuttagaannik Nersornaammik sølvimik saqqarmioqarluni.
Finn Lynge ukiut kingulliit kujataani najugaqarpoq qimataraalu nulii Rie Oldenburg taassumalu qitornai. Nuliaminit siullermit inersimasunik marlunnik paneqarpoq.