Skip to main content

Finn Lynge pillugu eqqaaniut

Finn Lynge 80-nik ukioqarluni toqusoq pillugu Kommune Kujallermi borgmesteri Jørgen Wæver Johansen eqqaaniummik allappoq

Kommune Kujallermi borgmesteri Jørgen Wæver Johansen Siumumeersup Finn Lynge eqqaaniarlugu allappoq. Finn Lynge sivisuumik napparsimareerluni 80-nik ukioqarluni Qaqortumi angerlarsimaffimmini tallimanngornerup ullaavani toquvoq:

'Aliasuutigingaakkatsinnik paasivarput inuk tamatigoortorsuaq Finn Lynge ullaaq toqukkut qimagussimasoq. Palasi, atuakkiortoq, oqallissaarisartoq, allarpassuarnillu sulialik. 
 
Inuit ikittuinnannguit Finnitut aqqusaagaqarsimapput. Finn inuuvoq Nuummi 1933-imi, angajoqqaaralugit aaqqissuisoq Kristoffer Lynge nulialu Regnhild. Københavnimi ilinniarnertuunngorpoq upperisamullu ilinniagartuunngorluni, kingornalu USA-mi Danmarkimilu katuullit palasiattut sulilluni 1965-imi Nuummi palasinngornissami tungaanut. Kingorna isumaginnittoqarfimmi sulivoq 1974-imiillu 1979-imut KNR-imi pisortaalluni, taavalu 1979-imiit 1984-ip tungaanut europaparlamentimi sinniisigaarput. Aamma Nunanut Allanut Ministeriaqarfimmi Kalaallit Nunaat pillugu immikkut ilisimasalittut sulivoq kiisalu Københavnimi Namminersornerullutik Oqartussat allaffianni siunnersortaanerusimalluni. Tamatuma saniatigut siulersuisuni assigiinngitsorpaalussuarni inissisimasarpoq, pingaartumillu Gardar Foundation pingaartitaralugu peqataaffigisimallugu. 

Isummani annittuaannarpai 
Finnip suliat soqutigisani tamatigut pimoorulluinnartarpai. Isummani oqaatigiuaannarpaa apeqqutaatissanagulu kina oqaluunnerini. Siunnersoqqugaanni susaarfiunngisaannarpoq. Inuk immikkuullarilluinnartoq. Ilisimasarpassuaqarpoq oqaatsillu assigiinngitsorpassuit atorsinnaallugit. Atuakkiai soqutiginartuaannarput paatsuugassaajunnaarlugillu allagaasimasarlutik. Kingullermik eqqaamalersaarutai marluiit Et Langt Liv På Tværs saqqummerput soqutiginaqisunik paasissutissarpassuaqarlutik. Inuuneranut tunngasuinnaanngillat, aammali nunatta (politikkikkut) oqaluttuassartaanut tunngasunik imaqarlutik. 

Nunatsinni saqqumilaartut ilaat 
Nersornaammik saqqarmioqarpoq siornalu Ilisimatusarfimmi ataqqinaammik doktorinngorluni. Taamani dr. phil. Thorkild Kjærgaard oqarpoq Finn Lynge 1900-ikkut qeqqisa kingorna Kalaallit Nunaata inuunerani ilorlermi qallermilu inuit malunnaateqarnerpaat ilagigaat. Oqaluttuarisaaneq peqataaffigiinnarnagu annerusumik angusaqarusuppoq. Oqaluttuarisaaneq pilersitseqataaffigiinnarnagu oqaluttuarisaanermi eqqaamaneqartussanik angusaqarusuppoq. Taamaaliortorlumi Thorkild Kjærgaard oqarpoq. 
 
Ilumullumi taamaaliorpoq. 
 
Finn qallunaatsiaqarfimmut Qassiarsummut qanittuuvoq, taamaammallu Qaqortumi eqqaaniaanerup kingorna nunaqarfimmi tassani Thorhildurip oqaluffiata eqqannguani qasuersaarfissaminut ilineqarnissaa inuunerata imaqaqisup ataqqinartumik naggatissaraa. 
 
Nulia Rie, paniilu misigeqatigalugit eqqarsaatitsinni najorpavut. 
 
Ataqqillugu eqqaaneqartarili. Nunarput pillugu nunatsinni nunanilu allani sulingaarsimanera pillugu Finn eqqaamajuassavarput', Jørgen Wæver Johansen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER