naalakkersuisunngortoq
Finn Karlsen Naalakkersuisutut akuerisaavoq
Inatsisartuni amerlanerussuteqartut Finn Karlsen Siumumeersoq aalisarnermut, piniarnermut nunalerinermullu naalakkersuisut akueraat
Finn Karlsen aalisarnermut, piniarnermut nunalerinermullu naalakkersuisunngorpoq. Naalakkersuisuni ilaasortanngornera 18-nit ilalerneqarpoq, aqqanillit taaseqataanngillat marlullu akerliullutik taasillutik.
- Avissartuunnermut avissaartuutsitsiniaanermullu nukiit atussanngilagut. Kattuffiit qanimut suleqatigisariaqarpagut, Siumup oqaaseqartuaa Jens Immanuelsen inatsisartut oqaluttarfianniit oqarpoq.
Inuit Ataqatigiit eqqarsarnartoqartippaat naalakkersuisooqatigiit ingerlaannarnissaat.
- Qinersinerup kingorna aappassaa naalakkersuisuni taarsiisoqareerpoq. Taarsiinerit pitillugit sulineq unitsinneqarlunilu kinguarsaataalersarpoq, Inuit Ataqatigiit siulittaasuat Kuupik Kleist oqarpoq.
Finn Karlsenip naalakkersuisunngornissaa taasissutigineqarmat Inuit Ataqatigiit taaseqataanngillat Demokraatit akerliusut. Taakku innersuussutigaat 2005-miit 2009-mut pisimasut taamani Finn Karlsen aalisarnermut, piniarnermut nunalerinermullu naalakkersuisuuvoq.
- Taamanikkut suliaq pitsaanngitsumik naammassimaa, Anda Uldum Demokraatit sinnerlugit oqarpoq.