peqquserluttoqarneranik suliaq
Filmimi 'Nummioq'-mi ingerlatsisup eqqartuunneqarnissaagalua politiinit taamaatinneqarpoq
Otto Rosingip suliffeqarfiullu Greenland Venture-p Mikisoq H. Lynge unnerluutigaat millionip affaanik peqquserlussimanerarlugu. Suliarli Nuummi politiinit taamaatiinnarneqarpoq paasissutissat amigarneri pissutaalluni
- Ukiut sisamat suliaq misissorneqarpoq, tamanna imaannaanngilaq. Taamaattumik suliap ingerlateqqinneqannginnissaanik aalajangertoqarnera nuannaarutigaara.
Filmimi Nuummiumi ingerlatsisoq Mikisoq H. Lynge ilisimatitsivoq.
'3900 Pictures ApS'-ip filmiliaa 'Nuummioq' 2009-mi suliarineqartoq eqqartorneqarpoq. Filmimik ingerlatsinermi aningaasatigut ajornartorsiorneq pillugu tusagassiuutitigut malinnaaffigineqareerpoq. Tamanna 3900 Picturesimi suleqatigiissimasut, Mikisoq H. Lyngep aamma Otto Rosingip, aaqqiagiinngilernerannik kinguneqarpoq.
Politiit Mikisoq H. Lyngemut unnerluussinertik unitsiinnarsimallugu inuttaata nalunaarutigaa. Mikisoq H. Lyngep inatsisinik unioqqutitsisimasinnaaneranik politiit paasissutissanik amigaateqarnertik taamaasillugu suliaq unitsiinnarlugu.
Lynge pinngitsuunerartoq
Otto Rosingip aamma Greenland Venturep filmimut aningaasaliisooqataapput, taakkulu Mikisoq H. Lynge pasivaat aningaasanik atornerluisimanerarlugu, suliarlu pillugu AG arlaleriarluni allaaserisaqartareerpoq. Aningaasat Mikisoq H. Lyngep nammineq inuttut aningaasat atortarsimagai ilaatigut unnerluuteqarput.
Taamatulli pisoqarneranut Mikisoq H. Lynge pinngitsuunerarpoq. Suliffeqarfiup aningaasaataanik aningaasartuuteqartarsimanini tusagassiutinut Mikisoq H. Lyngep oqaatigisareerpaa, kisianni aamma suliffeqarfiup akiligassai nammineq kaasarfimminit akilertarsimallugit oqarluni.
- Politiit suleqatigalugit pisoq itisilerlugu saqqummiutereerpara, aamma kukkusumik unnerluuteqartoqarnera nassuiaassutigereerpara. Taamaammat unnerluussinerit politiinit atortussaatinneqanngillat, Mikisoq H. Lynge tusagassiutinut nalunaaruteqarpoq.
Peqquserlussimanerarneqartoq
Mikisoq H. Lynge suliffeqarfimmit Greenland Venturemit aamma Otto Rosingimit unnerluunneqaraluarpoq. Millionip affaanik atornerluisoqarsimanera unnerluunneqaraluarpoq.
Filmi kalaallinit siullerpaalluni suliarineqartoq 'Nuummioq' pingasunit pigineqartuuvoq, tassa Otto Rosingimit, Mikisoq H. Lyngemit aamma Greenland Venturemit.
Filmi 2009-mi takuteqqaarneqareersoq suliffeqarfik akiliisinnaajunnaarpoq. Taamaasilluni suliffeqarfik million koruunip tungaanut akiligassaqarluni aamma sulisunut akissarsiassanik suli akiliutissaqarluni matuinnarpoq. Filmi Oscarinnattussatut innersuunneqartussatut siunnersuutigineqaraluarpoq, kisianni 2010-mi Oscarinnattussatut innersuunneqanngilaq.