Filmiliortartut: Suleqatigiinniarnermut pissutsit marluk killilersuipput

Kalaallisut filmiliornissamut qinnuteqartoqarsinnaannginnera, kiisalu danskit innuttaasuinut kiffartuussilluni TV-ikkut aallakaatitsiviinut kalaallit filmiliaannik takutitsisinnaannginneq suleqatigiinniarnermut killilersuisoq, peqatigiiffik Film.gl isumaqarpoq.

Film.gl-imi siulittaasoq Klaus Georg Hansen assimi takuneqarsinnaavoq. Folketingip Kalaallit Nunaat pillugu ataatsimiititaliaanut Film.gl allagaqaqqammerpoq.

Filmiliornermut peqatigiiffik Film.gl, Klaus Georg Hansenimit siulittaasuuffigineqartoq, folketingimi Kalaallit Nunaat pillugu ataatsimiititaliamut saaffiginnissuteqarpoq.

Kalaallit filmiliortartuisa Danmarkimik suleqateqarniarnerat killeqartoq peqatigiiffiup malugeqquaa.

Film.gl-ip eqqarsaatigaa kalaallit filmiliortartut danskit filmiliortarfiinut suleqateqarluartoqartoq.

- Inatsisit isumaqatigiissutillu pissutaallutik ajoraluartumik Kalaallit Nunaannit Danmarkimiillu filmiliortartut suleqatigiinniarnerat killeqarsinnaasarpoq, Film.gl folketingimi Kalaallit Nunaat pillugu ataatsimiititaliamut saaffiginnissummi allappoq.

Oqaatsit pingaartinneqarnerusariaqartut

Kalaallit savalimmiormiullu oqaasii pingaartinneqarnerusariaqartut Film.gl-imit tikkuarneqarpoq:

- Det Danske Filminstitut (DFI) filminut danskisut oqaasilinnut kisimi aningaasaliisinnaassasoq filmiliortarneq pillugu inatsisaasoq paasineqarsinnaavoq. Kunngeqarfiup Danmarkip kalaallit savalimmiormiullu oqaasiinik pingaartitsinerusariaqartoq Film.gl isumaqarpoq. Danskisut oqaatsit kunngeqarfimmi pisortatigoortumik kisimi oqaasiunngillat.

Danskisut filmiliorniat assigalugit kalaallisut (savalimmiormiusulluunniit) filmiliorniartut naligiimmik qinnuteqarsinnaalernissaat Film.gl-imit ujartorneqarpoq.

- Kunngeqarfimmi Danmarkimi filmiliornerup tungaatigut siammasinnerusumik takusassiisoqartalersinnaagaluarpoq, Film.gl tunngavilersuivoq.

Nunatsinnit filmiliarineqartumik siullerpaamik takusassiineq

Kalaallit filmiliaannik Danmarkimi innuttaasunut kiffartuussilluni TV-ikkut aallakaatitsinnaaneq ajornannginnerulertariaqartoq Film.gl isumaqarpoq.

Kalaallinit filmiliarineqarsimasoq DR-imi takutinneqaqqammerpoq.

Filmiliaq takutinneqartoq tassaavoq 2009-mi filmiliarineqarsimasoq 'Nuummioq'.

Naligiinnerusumik sullissineq ujartorneqarpoq

- DR innuttaasunik kiffartuussinermini kalaallit filmiliaannik takutitsinissamut piumasaqarfigineqarnikuunngilaq. Film.gl-ip kissaatigaa, Kunngeqarfimmi Danmarkimit filmiliat DR-ikkut takutinneqartalernissaat, taannalu innuttaasunut kiffartuussinissamut inatsimmi piumasaqaataalissasoq innersuussutigalugu. Kalaallit (savalimmiormiullu) filmiliaat Danmarkimi filmiliat assigalugit naligiinnerusumik takutinneqarsinnaasariaqarput. Kalaallit savalimmiormiullu filmiliaat, danskit filimiliaat assigalugit, DR-ikkut piffissami aalajangersimasumi takutinneqarsinnaasariaqarput, Film.gl allappoq.

Taamaasilluni Kunngeqarfik Danmark ataqatigiinnerusumik ingerlalersinnaasoq, peqatigiiffik isummerpoq.

Powered by Labrador CMS