Filmiliortartut nunani tamalaani angusaqarusuttut
Polarama Greenland pilersinneqaqqamersoq filmiliortartut nunanit tamalaaneersut Kalaallit Nunaanni filmiliortanissaannut ikiuutaassaaq.
Filmimi sammineqartoq Kalaallit Nunaanni pisimasuutinneqarpat, taava filmi Kalaallit Nunaannut assinguinnartassanngilaq. Filmili Kalaallit Nunaanni immiunneqartassalluni.
Polarama Greenlandimi tamanna anguniagaavoq.
- Tamanna anguneqassappat angusaq annertullunilu pitsaassaqaaq, Pipaluk K. Jørgen Emilie Hertling Péronardimik peqateqarluni Polarama Greenlandimik pilersitseqqammersoq nuannaaqaluni oqarpoq.
Ingerlatseqatigiiffimmit tv-kkut aallakaatitassiortartut filmiliortartullu Kalaallit Nunaanni immiusserusuttut arlalippassuarnik neqeroorfigineqartassapput. Kalaallillu filmiliortartut taakku marluk Islandimi Polaramami filmiliortartunik suleqateqalersimapput.
Islandimimi nunani tamalaani filmiliortartut nunaminni immiussisarnissaannut kajumissaarisarnermik misilittagaqarluarput.
- Islandimi suleqatittta nunanit tamalaanit filmiliat ukiuni 15-ini takutitassiarisarsimavaat, Pipaluk K. Jørgensen Sermitsiaq.AG-mut oqaluttuarpoq.
Norge Islandilu unammillerneqartut
Ukiuni kingullerni Kalaallit Nunaata nunarsuarmiunit eqqumaffigineqarnerulernera tv-kkut aallakaatitassiortartunut filmiliortartunullu sunniuteqarsimavoq.
Unammillernartorli tassaasimavoq, filmi nangeqattaartuliarluunniit Kalaallit Nunaanni pisimatinneqaraluaraangalluunniit, Islandimi Norgemiluunniit immiussisoqarsinnaasarnera.
Assersuutitut taaneqarsinnaavoq nangeqattaartuliaq ”Tynd Is”, Polarama Greenlandip Islandimi suleqataasa Kidda Rokkip aamma Steinarr Logi Nesheimip suleqataaffigisimasaat:
- "Tynd Is"-imut tunngatillugu allamik periarfissaqarsimanngilagut, tassa kisianni Islandimi immiussinerit amerlanersaat ingerlallugit. Kalaalilli isiginnaartitsisartut filmiliortartullu suleqatiginerisigut, Kalaallit Nunaata immiussiffissatut ilippanaateqarluarnera paasilersimavarput.
- Nunat ilusaat sumilu inissisimaneri kisiisa eqqarsaatiginagit, aammali pingaartumik kalaallit pikkorissusaat soorunami aamma oqaluttuallaqqissusaat eqqarsaatigalugi, Kidda Rokk aamma Steinarr Logi Nesheim oqarput.
Suliniutissat isumaqatiginninniutigineqartut
Pipaluk K. Jørgensenip oqaluttuaraa, Polarama Greenland suliniutinik tigussaasunik arlalinnik piareersaalluni suliaqartoq.
Tamatumani ilaatigut pineqarpoq nunat tamalaat filmiliaat annertooq, danskiusumit Oscarinnassimasumit Anders Walterimit aamma svenskiusumit Cannes-imi nersornaaserneqarsimasumit Isabella Eklöfimit filmiliaq.