Filmiliortartoq millionit affaannik kulturimut tapiissutinit pissarsivoq
Kulturimut aningaasaliissutit 2,3 millionit koruuninit amerlanerusut agguaanneqarput, Nina Paninnguaq Skydsbjerg Jacobsenilu pissarsiaqarnerpaavoq, katillugu filminik suliniutinut pingasunut 500.000 koruuninnappoq.
Ukioq manna kulturimut aningaasaliissutit kiisami aggguaanneqarput – apriilimi Inatsisartunut qinersisoqarnera pissutigalugu kinguaattuungaatsiarlutik.
Aningaasat amerlanerpaat
Aningaasat amerlanerpaat Milik Publishingimut kalaallit atuakkiaannut tunngasunut 246.000 koruunit suliniummut ‘’Tulluartoq 1-2’’-mut tunniunneqarput.
Kisianni aningaasanik pissarsinerpaaq, tassaavoq Nina Paninnguaq Skydsbjerg Jacobsen, marloriarluni suliniutinut ‘’Alanngut Killinganni’’ – Qaqqat Alanngui 2 aamma ‘’Updated’’ 200.000 koruuninnappoq, kiisalu filmiliaq ‘’Walls’’ 100.000 koruuninik pissarsivoq.
Sulinermut legatit
Tassani aamma Katti Frederiksen atuakkanut suliniutinut marlunnut 35.000 koruuninik aamma 60.000 koruuninik ‘’Akiuunnera’’ aamma ‘’Helbred dit sind’’ pissarsisimasoq takuneqarsinnaavoq.
Suliniutit 19-it aningaasaliiffigineqarput. Aammattaaq inuit tallimat eqqumiitsuliortutut sulinerminnut legatinnapput.