Filmiliortarfimmi siulittaasoq: Filmiliorneq uuliamik tunisassiornermut taarsiullugu siunniuttariaqarparput
Film.gl-imi siulittaasoq isumaqarpoq, nunani tamalaani filmiliortartut nunatsinni filmiliortinneqartarnerisigut aningaasarsilluartoqarsinnaasoq
Filminik tunisassiortartut nunanit allaneersut nunami maani filmiliortinneqartarnerisigut aningaasarsilluartoqarsinnaavoq.
Film.gl-imi siulittaasoq Klaus Georg Hansen aviisimi Sermitsiami allaatigisamini allappoq.
Innersuussutigaa nalunaarusiaq, tassani takuneqarsinnaavoq filmiliortarneq tv-kkullu isiginnaagassiortarneq nunarsuami sukkasuupilussuarmik annertusiartortoq.
- USA-miinnaq tv-iikkut nangeqattaartuliat nutaat 2011-mi 266-init 2019-imi 532-nut amerleriaateqarsimapput.
- USA-mi filmiliorfiit annerpaat 16-it 2019-imi filmiliornermut Amerikami uuliamik tunisassiortut tamarmiusut uuliamut aningaasaliissutaasa amerlaqataannik aningaasaliissuteqarsimanerat missingerneqarpoq..
Kalaallit Nunaat soqutigineqarluartoq
Klaus Georg Hansen isumaqarpoq, Kalaallit Nunaat filmiliornermut tunngatillugu immikkut illuinnartunik tunniussaqarsinnaasoq.
- Nunani allani filmiliortartut akornanni Kalaallit Nunaaliarnissaq nunarpullu tunuliaqutsiullugu filmiliornissaq soqutigineqartorujussuuvoq. Nunarput asseqanngilaq tunuliaqutsiullugulu filmiliorfigerusunneqartorujussuulluni. Assersuutigalugu TV-kkut nangeqattaartuliaq piffissami matumani takutinneqartartoq Tynd Is Kalaallit Nunaannik tunuliaqutsiussatut annertuumik atuiffiuvoq.
Kalaallit isiginnaartitsisartut arlallit tv-kkut nangeqattaartuliami peqataapput.
- Uuliamut taarsiullugu
Klaus Georg Hansen oqaluttuarpoq, filminik tunisassiortartut arlalissuit ukiuni kingullerni maani susassaqartunut assigiinngitsunut saaffiginnittarsimagaluartut, kinguneqartanngitsumilli. Nunatsinnukarlutik filmiliornissaminnik kissaateqartarsimagaluarput, kisianni saaffiginnissutit tamakkua suliarinissaannut isumaginissaannullu periarfissaqartoqarsimanngilaq. Taamaammat filmiliortartut nunatsinnukartikkusullugit amerlanerusunik aningaasaliissuteqartoqartariaqartoq, taanna isumaqarpoq.
- Kalaallit Nunaat uuliasioqatigiiffinnik ukiorpassuarni maanga kajungilersitsiniarsimagaluarpoq, tamannali nunamut aningaasanik annerusumik isertitaqarnermik suli kinguneqarsimanngilaq. Kalaallit Nunaata sammivimmik allanngortitsariaqarneranut filmiliornermillu nunamut annertunerujussuarmik kajungilersitsiniartariaqarneranut pissutissatsialappassuarnik taaguisoqarsinnaavoq.
Ilanngullugu oqaatigaa, inuiaqatigiit iluanaarutinik sukkanerusumik pissarsisalissasut, nunap nunanit tamalaanit tusaamaneqarnera iluaqutitaqassasoq pinngortitamillu annikitsuinnarmik artukkiisoqartassasoq, tassa filmiliorneq uuliasiornermut sanilliullugu taassuma isaani pitsaanerugami.
Klaus Georg Hansenip aviisimi Sermitsisami allaaserisaa tamaat atuaruk, ugguuna pisiarisinnaavat: