Filmi piviusulersaarut aqqutigalugu danskit ilinniarnertuunngorniartut Kalaallit Nunaannut tunngatillugu ilisimasaqarnerulersinneqassasut
Danskit ilinniarnertuunngorniartut Kalaallit Nunaat pillugu ilisimasaqarpallaanngillat. Tamanna filmit piviusulersaarutit pingasut tunngavigalugit ilinniartitsissutiliat nutaat atorlugit allanngortinniarneqarpoq
Filmit 'Sumé- mumisitsinerup nipaa', 'Lykkelænder' aamma 'Håbets Ø' Kalaallit Nunaat pillugu assigiinngitsupilussuarnik oqaluttuartuupput.
Ataatsimoorlutilli inuiaqatigiinni kulturimilu pissutsit assigiinngitsut takutippaat. Websitemi nutaami Levendegrønland.dk-mi Kalaallit Nunaat pillugu danskinut ilinniarnertuunngorniartunut ilinniartitsissutissami maanna taakku tunngavigineqalerput.
- Filmit piviusulersaarutit kulturinik, oqaluttuarisaanernik inuiaqatigiinnillu pissutsinik allanik paasisaqarnissamut pingaaruteaqartartut ilisimavarput. Taamaammat Levendegrønland isumassarsiaraaput, Emile Peronard (Ánorâk Film) aamma Vibeke Vogel (Bullitt Film), Levende Grønlandimik filmiliortut tusagassiorfinnut nalunaaruteqarnerminni oqarput.
- Filmit taakku pingasut imamikkut assigiinngitsupilussuit assigiinngitsutigut oqallinnermut tunngaviusinnaapput, Emile Peronard Sermitsiaq.AG-mut itisiliilluni oqarpoq.
Filmit pitsaasumik oqallitsitsisartut
Undervisningsministeeriaqarfiup siorna Epinionimut nalunaarusiareqqusaani atuarneqarsinnaavoq, danskit inuusuttaasa Kalaallit Nunaat pillugu ilisimasaat killilipilussuusut.
- Ilisimasat assigiinnginnerat, tassa kalaallit Danmark pillugu ilisimasaqartupilussuit, akerlianik danskit Kalaallit Nunaat pillugu ilisimasaqarpianngitsut kalaallit uagut Danmarkimiittugut ullut tamaasa misigisarparput. Arlaata tamanna iliuuseqarfigisariaqarpaa, maannalumi uagut taamaaliorpugut, Emile Peronard oqarpoq.
- Filmit taakku pingasut maanna arlaleriaqaluta takutereerpavut, takutitsinivullu tamatigut pitsaasumik oqallinnermik nassataqartarput. Oqallinnerit, Kalaallit Nunaat pineqartillugu oqallittarnernit imaqarnerujussuusarlutik.
Site Danmarkimi ilinniarnertuunngorniarfinni ilinniartitsisut pikkorinnerpaat oqaasertaliisartumik suleqateqarlutik suliarisimavaat. Ilinniartitsissut kalaallit pillugit filminik piviusulersaarutinik taakkunannga pingasunik tunngaveqarpoq, ilinniartitsissutinilu sisamani; inuaqatigiilerinermi, danskisoornermi, oqaluttuarisaanermi tusagassialerinermilu ilinniartitsissutissatut neqeroorutaallutik.
Levende Grønland, Kalaallit Illuanni Københavnimiittumi februaarip tallimaani ilassinninnermut atatillugu takuteqqaarneqassaaq, filmi Børne- og Undervisningsministeeriaqarfiup agguagassaataannit kiisalu Det danske Filminstitutimit aamma Dronning Margrethep Prins Henriullu Aningaasaateqarfianit tapiiffigineqarluni Bullitt Filmimit Ánorâk Filmimillu suliarineqarsimavoq.